20個月

YEAH！我終於都2字頭，有20個月大啦﹗不過媽媽呢排都比較忙，唔係出咗去整佢自己D嘢，就係帶咗我出去玩，所以呢篇20個月大嘅blog都搞到遲咗兩日先出到街囉﹗



講返呢個月嘅飲食狀況先，由上個月開始已經變咗一日四餐戒咗夜晚臨瞓前枝奶，早餐就用飲管杯飲七安奶加其他包餅或者cereal同糊仔咁，午餐晚餐就自己坐定定食晒一碗半大人碗既飯餸，下午茶就食零食加水果，開始會揀食物食，講咗要A就死都唔肯要B，有時仲會只撩D餸食唔願食飯。

八隻牙仔終於都出齊，雖然仲未有大牙，但媽媽見我咁牙痕成日搵嘢咬，就試吓畀成個蘋果我自己咬，我好畀心機係咁咬㗎，識得個芯係唔食得，不過唔知個掟係唔使咬就吞埋落肚囉（艾菲：同婆婆講電話講多兩句佢就吞咗個掟﹗睇少眼嘅話佢連個底都想食埋添呀﹗）﹗而最近兩次出街，媽媽都話唔夠時間煮無帶飯仔畀我，要我食餐廳D食物就算，唔...麻麻地like但都有食晒嘅，爸爸媽媽就讚我進步咗好多（之前係頂多食大半碗就唔食，宜家可以食晒一碗）， 遲吓去旅行佢哋就可以輕鬆D喎。

至於瞓覺就一切如常，夜晚十點就會落床，不過好多時都碌到差唔多十一點先瞓，瞓到第二朝九點半起身，就算八點跟爸爸一齊醒咗，只要媽媽話未夠鐘我都會乖乖地瞓返，或者自己坐係床等到媽媽鬧鐘響先嘈（艾菲：呢個行為真係超抵讚﹗），不過半夜三、四點醒咗會怕黑唔畀媽媽熄燈，否則我會爆喊唔收聲，媽媽要熄燈瞓唯有拖住我手瞓直至我OK先放手。晏覺就一日瞓一次，每次兩至三個鐘左右，呢個星期仲開始去返自己間房到瞓添，媽媽話過埋呢個夏天我就連夜晚都要係呢間房瞓啦﹗



出街如果心情好都會自己行，但成日一枝箭咁想fing甩大人手跑咗去，最鐘意就係行樓梯同斜路之類嘅嘢，入字腳嘅問題依然無改善，不過行街行到成日跌嘅情況少咗，好多時都係我專登跌落地扮嘢（艾菲：都唔知扮跌有乜咁好玩﹗），上落樓梯都越來越smooth，去公園都開始肯學吓爬鋼架，連會搖嘅吊橋都夠膽行添﹗

講嘢方面越來越叻，乜都聽得明乜都識得講，唔會再好似之前咁亂答問題，經常性跟大人口水尾講嘢，媽媽問我叫咩名我就跟住講「咩名」，佢一講我個中文名我又會自己重複講N次，有次睇到巧虎唱「一閃一閃小星星」就即刻跟住唱返成句出來，亦開始講到D簡單句子，例如「我食奶奶」，「唔該爸爸」，「公公食飯」，「媽媽靚靚」，「探BB」，「唔影（相）」。

繼續唔肯學ABC同數數字，但就認得個A同O字，媽媽問我爸爸去咗邊我會答「阿工」（個阿字係用返工個tone來講），講極都唔啱音就會答佢去咗「搭車」算，好鐘意講個「咗」字，成日都會講「跌咗」，「停咗」，「執咗」，「爛咗」，坐車成日一坐底就講「開車」同「唔開燈」（巴士落車嘅燈），坐電梯時一入去會指住頭頂個抽氣扇講「風扇」，咩都會「嘩」一餐，好似上次去飲時D姐姐上菜會好讚歎咁「嘩」一聲出來，就連平日poo poo完望返落馬桶都會咁樣「嘩」出來讚自己。



模仿能力越來越高，記憶力亦相當之高，好多嘢做一次教一次已經識，幼潛老師教太陽伯伯，我第二堂見到已經即時指住叫伯伯，媽媽教我月亮姐姐，我去到IKEA見到盞月亮燈又會即刻喪叫姐姐，媽媽搽唇膏我會摞住搽埋一份，搽完仲識將個咀唇合埋「扑」一聲出來，佢幫我搽cream我又會跟住郁手自己搽埋一份，佢朝早噴濕個頭先梳頭我都會即刻衝埋去要佢噴吓我，媽媽見我咁鐘意搞大人D手錶，就帶咗我去扭人生中嘅第一隻蛋，扭到隻好得意嘅line手錶，宜家我出親街都要帶住㗎﹗

自理能力都有唔少進步，除咗本身已經識嘅自己食嘢同飲水，出完街返屋企仲識得自己除咗對鞋出來放好（之前要大人幫先得，宜家已經可以自己來），又會自己揀衫揀鞋著，開始肯幫手拎吓嘢，有時仲會主動幫爸爸媽媽丟垃圾，除咗會搶住幫手吸塵，見到媽媽收衫都會搶住收衣夾，連potty training都開始正常返，poo poo會主動同大人講「唔唔」，自從媽媽買咗個摺得埋嘅廁板畀我之後，我唔使再死忍到返屋企先poo啦，至於wee wee就停咗成個月無train到，媽媽話佢頂我呢個無賴唔住要休息吓，等佢遲吓得閒D心情好D同天氣好D先再挑戰過喎﹗



最後又係講情感發展嘅時候啦，呢個月好明顯係痴多咗媽媽，媽媽係廚房煮飯就會搬晒D玩具去廚房門口望住佢煮飯，佢一轉陣去咗洗手間又會成堆玩具咁跟埋過去，有時媽媽一行開我就會大大聲叫住佢，如果佢放低我係婆婆到走咗去，雖然我唔會扭同嘈都會玩玩吓叫「媽媽」同搵吓媽媽係唔係房。宜家我越來越鐘意Mic Mic（Mickey & Minnie嘅統稱），終於夠膽同大大隻Mic Mic做住happy face咁合照，有次夜晚忽然發燒媽媽話要貼退熱貼，我本身好唔鐘意會用手撕返落來㗎，但貼咗個Mic Mic貼紙落去之後我就好鐘意啦﹗



至於怕陌生人同陌生地方嘅情況有明顯改善，雖然未至於會主動撩人同佢玩，但就算扮怕醜都會笑笑口，唔會dup低頭dup到見唔到樣同肯同人講bye bye，如果去playroom同公園玩就最鐘意埋D哥哥姐姐堆，就算人哋完全唔理我都會跟住佢哋跑來跑去，又會學佢哋趴係到sir滑梯同瞓係地下到唔郁。

至於脾氣係一貫咁臭，有不滿就尖叫同摞地發癲呢兩樣嘢係完全無改善過（艾菲：好似越來越嚴重添，唉...），仲試過好多次返playgroup時唔想同同學仔share玩具就大叫一聲來嚇走人（艾菲：呢樣嘢真係好頭痛，唔share玩具都唔應該用咁嘅態度對人嘛），naughty corner幾乎係每日都一定會過去企/坐一陣（艾菲：分別只在於係一日幾次嘅勁扭定一日一次嘅小扭），講「唔住，媽媽」已經講到好似食生菜咁，媽媽話佢來緊真係要再諗吓對策來應付我喎﹗