南瓜露

因想食住家飯而跑落街買餸，但回家打開雪櫃才發現有大半個南瓜，早兩星期買回來預備米高生日蛋糕的剩餘物資...不想打亂想好的煮飯計劃，只好將南瓜變成甜品，但到底做甚麼甜品好味得來又快靚正兼可以一次過將它徹底清除呢？

思前想後再上網搜尋，本來想做南瓜西米露，不過家裡的西米原來早已用完，那麼便做滑滑南瓜露吧，花了兩小時終於完成，過程中最難是刨南瓜皮和切粒，如果精於刀法相信不消一小時已經可以完成，至於味道...當然是勁南瓜啦﹗

以下是綜合多個食譜再作改良的食譜：

南瓜露

南瓜      1個
水          1.5升
椰汁      1罐（大）
忌廉      200ml（如沒忌廉可改用奶）
冰糖      適量（如沒冰糖可改用砂糖）
生粉      適量

步驟：
1. 將南瓜去皮起肉切粒，以大火蒸約10分鐘至熟透（亦可蒸熟後才刮肉）
2. 將蒸熟之南瓜放進攪拌機，連同0.25升水一起攪拌成南瓜蓉（沒攪拌機可直接將南瓜肉壓成蓉，但肯定沒攪拌機般滑身）
3. 煲滾1.25升水後倒入南瓜蓉，加入冰糖按自己口味逐少調味（南瓜本身已有甜味，所以只放少量糖即可，過多糖會蓋過南瓜的味道）
4. 調味後加入椰汁和忌廉至水滾
5. 以凍水將生粉開成生粉水，逐少加入並不停攪拌，至杰身即可。