初生相＠Day13

呢個五月話咁快就過，仲有一個星期BB豆豬就滿月啦﹗

D人成日話BB大得好快，特別係頭一個月變化最大，要同佢哋影多D相記低佢，否則錯過咗就唔同晒樣，可惜想當年燒腩仔出世時，艾菲只識為佢餐媽媽奶埋頭苦幹，撐到滿月先醒起無乜同佢影相，所以今次BB豆豬出世前，已經盤算住要盡早幫佢私影返輯初生相，亦一早搜集定唔同物資做足功課，當然都慶幸今次餵媽媽奶過程尚算順利（雖然仲係唔肯埋身...），令艾菲可以安心休息有足夠精神去完成呢件事。

一如之前嘅maternity photo，艾菲都係無俾錢搵人影，而係自己親自操刀舉機影，趁燒腩仔返咗學，BB豆豬又飲醉奶，就同米高夾手夾腳捉BB豆豬入房影，雖然說不上係專業級數，但總算係媽媽送畀BB豆豬嘅一番心意啦﹗



本來想學人包到BB豆豬成粒豆咁，但最後發現要包得靚都幾高難度㗎喎，嘻...



堅持唔同BB豆豬影露點相，始終係女仔來嘛，性感極都唔可以畀人睇蝕晒呢﹗

五日五夜仁安生B之旅~part 2

繼續艾菲個仁安生B爽YY之旅先，做完手術了無牽掛咁瞓咗一覺好之後，第二朝一早就食定早餐等Dr Wong來巡房，終於得佢approve可以落床，但唔知點解今次足足等咗成個鐘先有姑娘來幫艾菲拆喉拆機，之後又話要喺床坐四十五分鐘先可以正式落床，搞到艾菲白白錯過咗10:30一轉嘅餵奶時間，然後喺姑娘嘅幫手下成功落床，傷口都有少少痛但頂得住行到無暈，而姑娘就用個好驚訝嘅樣話艾菲勁，唔...睇來平日應該係有好多人頂唔住（醫生姑娘都話最痛係落床呢吓）。

落床OK後，艾菲即去梳洗一輪再換返自己衫，之後等米高送飯過來，食飽有氣有力就準時2:30去BB房餵奶，點知...BB房姑娘居然mark錯時間，以為艾菲6:30先過去，一早幫艾菲餵飽咗BB豆豬（嗰吓真係有D晴天pig pig嘅感覺）﹗﹗﹗結果佢當然對艾菲無乜興趣，但都有乖乖咁啜咗一陣，仲畀艾菲整到一面都係奶添（艾菲當時未上奶，但其實28周時已經開始有滲奶嘅情況，所以點都有D存貨畀BB豆豬）﹗



之後一次過去餵奶房，BB豆豬更加係好乖女咁同艾菲啜咗成個鐘，相比起想當年嘅燒腩仔，BB豆豬係啜得認真同有力好多，所以當晚明知自己未上奶，又撞正餵奶房夜晚裝修無得餵，本應爭取時間休息多D，艾菲都好勤力盡量擠D黃金初乳拎去畀BB豆豬半夜食。



可惜歷史總係重覆又重覆地上演，到第三日艾菲正式上奶，BB豆豬就開始抗拒微谷嘅艾菲，雖然佢無燒腩仔當年推開艾菲咁狠，但都係keep住啜幾啖又爆喊一輪，再加上兒科醫生話佢有D黃，艾菲知道自己無可能堅持全埋身同唔補奶粉，為求令佢順利跟艾菲一齊出院，跟住幾日都係餵奶前自己喺房擠鬆，再入餵奶房埋身加補人奶同奶粉。

五日五夜仁安生B之旅~part 1

話咁快就出咗院返咗屋企一排，雖然每一日都係混亂之中渡過，但總算叫做settle down，就等艾菲記憶仲深嘅時候，快手記返低五日五夜仁安爽YY生B之旅先。

手術前一日，艾菲依依不捨咁送埋燒腩仔上校車（眼淺媽媽差D忍唔住喊...），再放肆地去東海堂買多杯抹茶紅豆來飲，就返上樓做最後點算，等埋米高下午放工返來，我哋夠鐘就慢慢出發去仁安報到，因為係預約開刀，所以要先喺樓下大堂登記，事前都同米高講過近排有幾多case係大房full咗，要加錢upgrade去半私家二人房，點知真係畀艾菲開口中，咁呢D情況其實都無得揀㗎啦（除非臨時話返QE生），好彩一早同米高打定底有個預算...



艾菲上一次生燒腩仔時係住四人大房，感覺比半私家二人房仲闊落，而且都係兩個人share一個洗手間， 同二人房分別唔係太大，但今次住完二人房就覺得加錢upgarde都係值嘅，至少少咗一半病人，醫護人員同親友輪流入房嘅比例都少咗一半，真係靜好多休息得好D，特別係艾菲嘅同房都有個兩歲半大嘅小朋友，雖則醫院講明唔畀十二歲以下小朋友入病房，但我哋大家都OK唔介意，所以燒腩仔來探艾菲都好方便，而最最最正嘅係最尾兩日，同房走咗之後就一直無人再搬入來（應該係過咗五一黃金周所以好多吉位），變相艾菲自己一個住私家房，就住得更加清靜同爽YY啦﹗



喺大堂登記完就有staff帶我哋上三樓，上到去要先跟姑娘入房磅重（最後一星期都係無重到㗎，即成個懷孕期只係重得14磅）同量血壓，對個人資料，再同你做一輪答問環節，包括講解手術流程，教點著手術袍，提你幾點開始禁食，問吓BB飲咩奶粉（開刀第一日唔落得床點都會餵咗奶粉），揀邊個兒科醫生，老公入唔入去陪產，要唔要留臍帶血，要唔要手術室D相之類，基於有過上次生燒腩仔嘅經驗，艾菲都有晒model answer，話咁快搞掂，之後姑娘就會叫另一個同事入來剃毛毛，係有D唔舒服同尷尬，但來到呢個moment，艾菲已經豁出去啦﹗

Hello!

大家好﹗我就係燒腩仔個妹妹BB豆豬啦﹗雖然我第一日個look激似哥哥，但媽媽就一直堅持我同哥哥係唔同樣，佢話我女仔D﹗似媽媽多D﹗眼線長過哥哥D﹗連喊聲都溫柔D﹗你o地又點睇呀？

來到呢個世界幾日，我暫時最大o既工作就係食同瞓，最大嗜好係嘟咀同微微咀笑，媽媽讚我食得比哥哥叻，每次埋身都肯認真啜，唔似哥哥餐餐都呱呱嘈，不過媽媽一開始上奶，我就明顯食得差o左，希望我o地出院後可以慢慢夾到，等我做個全人奶B，幫爸爸慳返D奶粉錢啦﹗

至於媽媽呢，雖然所有o野都係預計之中進行，但佢話今次唔知點解比上一次生哥哥辛苦，傷口同宮縮都比上次痛，唯一係休息就好充足，皆因心情比上次輕鬆，同埋大房無位upgrade o左佢上半私家二人房（艾菲：今晚同房走o左，直情變o左私家房添﹗），清靜好多無咁多外來騷擾，佢話等佢抖夠返屋企settle down之後，就會慢慢同大家分享佢呢個五日五夜仁安之旅。

好啦，我宜家食飽奶奶好眼瞓啦﹗遲D先再同大家慢慢傾啦﹗

寫在BB豆豬出世前...（38W）

仲有唔夠三十六個鐘，BB豆豬就會出世，個肚明顯吹漲咗但都仲未到38寸，胎動喺呢幾日明顯少咗好多，下面三角位間中會有酸痛畀針拮嘅感覺，宮縮情況多咗但有過陣痛經驗嘅艾菲知道係假像來，只要平安度過今日，一切就會on schedule咁進行...

回顧返成個陀BB豆豬嘅過程，早孕期嘅不適係艾菲意料不及嘅，嗰種辛苦同無助感實在令人諗起都想喊（最唔開心係當時連米高都唔諒解，可能係陀燒腩仔時艾菲實在太輕鬆掛）， 到中期開始回復正常就只係一心諗住爭取持間同燒腩仔四圍去玩，甚麼胎教傾偈講故事係少之又少，直至中後期大病一場然後開始自覺輪盡行步路都唔行得快，難頂但深知做N無FTM係無可能有產假，唯有頂硬上繼續陪燒腩仔作戰到最後一刻。

來到呢個moment，走佬袋一早執好，BB豆豬嘅出院衫都預備好，入院期間照顧燒腩仔嘅事宜已經安排好，BB豆豬嘅嘢都準備得七七八八（剩低嘅就交畀米高喺艾菲住院期間完成佢啦），陪月都confirm咗邊日開工，預備畀BB豆豬返屋企時送畀燒腩仔份禮物已經pack好，就連之前set畀自己嘅target都完成晒（1. 整BB豆豬對鞋仔同口水肩 2. 一口氣睇晒汪培珽老師三本書 3. 影大肚相 4. 煲晒全套太陽的後裔 5. 食好東西），大致上可以做嘅嘢艾菲都處理好。

不過心情呢？艾菲到底準備好做第二任媽媽未？來緊一湊二嘅非人生活有信心捱過嗎？唔知點解，由37W開始，艾菲就有D忐忑不安，再一次諗返起2014年尾出現過嘅「佢」，艾菲知道BB豆豬得來不易要好好珍惜，亦因為BB豆豬艾菲先終於放得低「佢」，但眼見燒腩仔嘅不安情緒，每晚半夜起身喊住大叫「我要媽媽」，不禁又會懷疑自己堅持生兩個嘅決定啱唔啱，當初決定再生係想燒腩仔有手足之情，他日艾菲同米高老咗有咩事，都有個伴有個親人同佢有商有量，但艾菲同米高又係唔係真係做到對佢哋兩個公平公正不偏心？還是會令燒腩仔覺得爸爸媽媽畀妹妹搶咗？甚至搞到佢哋大個反面不和？

至於手術又係唔係一切順利？雖然今次已經係預約開刀，所有嘢有得一早預算好，無上次緊急開刀咁驚險，但意外嘅嘢真係話唔埋，萬一有事的話米高承唔承受到？唔好話手術出意外咁大件事，簡單如之後艾菲又因乳腺炎被捉入醫院幾日，燒腩仔同BB豆豬點算好？如果再一次畀醫生勸停餵母乳，艾菲又接受到呢個打擊嗎？無間餵奶同時招架燒腩仔嘅情緒，搞到屋企出現六國大封相嘅場面艾菲頂得住嗎？

OKOK...其實艾菲都知所有嘢只係自己諗多咗，「船到橋頭自然直」係燒腩仔出世之後艾菲一直沿用嘅態度，做咗三年半媽媽無理由仲唔明好多嘢唔到自己主宰，艾菲不過係得閒得滯所以搵D嘢來擔心吓，為咗燒腩仔，BB豆豬同埋米高呢三個至愛，艾菲一定會積極去面對將來嘅一切，大家安心等艾菲返來報喜啦﹗

行路問題＠第三次物理治療

呢個四月幾乎每個星期都要出入診所同醫院，唔係艾菲就係燒腩仔輪住來，終於來到BB豆豬出世前最後一次陪燒腩仔去做物理治療，由於米高今次真係請唔到假要艾菲單拖帶佢去，為免艾菲太頻撲我哋無揀到朝早嘅期，直接同燒腩仔請一日病假下午先去覆診（本來呢日學校生日會，艾菲都唔想佢miss咗，但安全計真係無辦法），見難得唔使趕頭趕命趕返學，兩母子拍拖去樓下pizza hut食個lunch先出發，確保大家都keep住開朗嘅心情。

食飽飽就出發啦，沿路有傾有講有笑，唔...我哋兩母子好似好耐無咁溫馨過，有時困喺屋企艾菲成日忙呢樣忙嗰樣，真係好難做到呢個效果，我哋早咗少少到，照例登記完同姑娘打個招呼就入得去玩，今次明顯比上次多人，前面有兩個BB練緊腳仔（其中一個應該係早產B，滿一歲但個size大概只得半歲，係睇見都覺心痛嗰種，所以話BB足月出世真係好緊要），同時間就有兩個同燒腩仔差唔多年紀嘅小朋友。

事前已經同燒腩仔講咗成晚，叫佢要乖要專心同聽姑娘話，明顯今次表現係有進步無之前咁失控，不過相對其他差唔多年紀嘅小朋友，佢確係比較唔專心嗰個，成日D嘢叫佢做兩做就偷懶，尤其係某D對佢來講有D難度嘅動作，佢通常試一兩次都唔得就叫唔做，搞到艾菲想話偷懶坐埋一邊都唔得，要不停喺佢側邊同佢打氣加油同教佢搵D成功嘅竅門出來（因為姑娘要一個對三個，仲要去處理paper work，所以吩咐好教咗D動作點做就會行開一陣）。

一入去姑娘就叫佢上彈床跳15分鐘，之後同佢做基本測試，姑娘都讚佢雙腳跳有進步，但單腳跳以三歲幾嘅年紀去睇就仲係差D，右腳會好力少少叫做跳得到，左腳就真係好勉強先跳得起，咁大家都明人總係取易不取難，既然右腳得左腳唔得，好自然燒腩仔練習時就更加只係集中用右腳唔用左腳，所以姑娘有提醒艾菲要睇實佢做，逼佢用返多D左腳來跳。

跳完彈床之後，姑娘跟住就拎咗個拋圈圈嘅玩具出來，叫燒腩仔要用腳逐個將D圈圈撩返出來，明顯同上次用腳面踢豆袋入籃嘅原理一樣，想燒腩仔多D用單腳，同領悟吓點樣喺單腳企時平衡個人，初時撩頭頂幾個都好容易做到，不過到最底兩個就真係有難度，一來燒腩仔隻腳仔唔太靈活，成日好傻瓜地用上而下踩落個圈到嘅方法來撩，要艾菲不停提醒先識得喺圈下面用腳指同腳面撩出來，二來係兩個圈D軟膠都有D啜身（上面D係硬膠圈），幾次佢都想坐低放棄浪費晒D時間，好彩逼吓勸吓都叫做完成到三次。

跟住姑娘畀佢玩咗陣回吓氣，就拎咗個波波出來，畀佢夾住跳過兩個矮欄，夾法係夾喺腳眼位，同我哋之前同佢練夾小腿唔同，目的其實係想佢學識雙腳跳時雙腳著地，其實呢個對佢來講應該唔難，但由於佢實在太唔專心，所以都搞咗好耐先做到一兩次...

做完夾波跳，唔覺唔覺又夠一個鐘，姑娘就埋來同艾菲傾咗幾句，佢話燒腩仔大致上都係差唔多情況，要繼續keep住練雙腳跳同單腳跳，然後約咗五月底再去做多次物理治療，重點係下次會換新姑娘跟進，唔...下次艾菲應該係坐月中，都唔知偷唔偷走到出來陪佢覆診，希望燒腩仔生性唔好蝦新姑娘啦...