北海道名古屋之旅～出發啦﹗

當大家睇到呢個post嘅時候，我哋一家三口已經到咗北海道，準備開展呢個長達十三日嘅北海道名古屋之旅啦﹗

一年前用aisa miles換嘅機票，終於都畀我哋等到出發呢一日，雖然有時都覺得米高想當日嘅決定好瘋狂，到宜家仲係有D擔心來緊呢十幾日搞唔搞得掂隻燒腩仔，不過一望到個長長嘅手信list艾菲又暗暗地覺得好興奮，畢竟我哋以前拍拖一年至少去一轉日本，但自從三年前暑假去完北海道補度蜜月之後，就一直無再坐過飛機去旅行啦﹗

按照慣例都係由米高做領隊，負責book機票，買旅遊保險，安排酒店，行程交通同飲食，艾菲呢個團友只需要帶齊行李準時出現機場check in就得，所以到目前為止艾菲其實都唔係好知自己會去邊玩（嘻...:P），只係同領隊講低咗想行西松屋，阿卡將，搵麵包超人，同行吓outlet睇LC咁，不過今次就肯定無以前咁輕鬆，始終係帶多咗個燒腩仔同行嘛。



以前執行李，用一晚時間就搞掂晒，但今次艾菲都嚴陣以待，一星期前開始諗定執D咩，雖然日本真係好方便乜都有得買，又雖然艾菲真係好想吉喼出發爆喼返，但淨係燒腩仔嘅衫褲鞋襪同用開嘅日用品已經唔少嘢，再加埋一大堆濕星嘢，就算唔帶片同濕紙巾打算過到去先買，依然係未出發已經塞爆喼咁滯﹗（咁艾菲仲點買嘢？）>.<



宜家日本同樣係夏天，就算北海道無咁熱，個太陽都唔會弱咗，再加上燒腩仔唔肯帶帽，所以防曬一定唔少得，另外仲要帶定雨褸備用，而且始終係戶外活動多，防蚊措施都唔可以懶（特別係艾菲呢個咁惹蚊又咁敏感嘅人），花露水同蚊貼之外仲專登買咗pack卡通防蚊手帶，希望燒腩仔會畀面帶吓啦﹗

團購Face體驗

早在燒腩仔兩個多月時，為慶祝燒腩仔公公婆婆結婚35周年，燒腩仔姨媽特別安排我們一家人到Face影家庭相，當時沒刻意為燒腩仔準備甚麼（始終佢唔係主角嘛），但Face的攝影哥哥都相當好人，特別替燒腩仔影了幾張初生BB照，艾菲至今重看仍然很喜歡呢﹗

對於Face的服務和質素艾菲都相當滿意和有信心，後來知道它們每年都會做一次團購，艾菲便一直密切留意，好不容易終於在三月中時給艾菲等到，想也沒想便立即買了$298的package，60分鐘影樓攝影服務，包兩個背景和20個soft copy。

coupon要在七月底前使用，即不可能用來影燒腩仔的兩歲相，但影歲半相又太趕急，於是決定拖到七月中，等米高忙完公司的peak season可以請假，我們出發去旅行前才影，畢竟燒腩仔的樣子大個一點，之後做生日布置時或者會用得著。

1600 Pandas@PMQ

由知道D熊貓會來香港開始已經好想帶燒腩仔去睇，但睇到報導同舊同行朋友係facebook到狂鬧佢之前D快閃活動只係做show，艾菲已經知道無謂去同人逼，一早決定等D熊貓去到最後一站，係PMQ settle down先會去，仲第一時間叫米高拎定假，再上網登記預約咗個平日嘅時間廢事排隊。



來到展覽嘅最後一星期，人潮可能無之前咁洶湧掛，我哋入場時連隊都唔使排，email都唔使show就可以直行直過，未入到展區已經見到牆上有好多唔同嘅熊貓布置。



至於燒腩仔呢，狀態簡直大勇超級興奮，艾菲只係早一星期開始同佢洗腦話佢知我哋會去睇熊貓，佢入到場即刻panda panda咁叫，仲擺晒chok pose畀艾菲影相添（但就成日唔肯望鏡頭囉）﹗

Printic

睇完查媽美子，NT哥哥，Amy MaMa同小檬媽嘅分享之後，艾菲都忍唔住用Printic呢個app曬咗相，價錢唔貴，容易用，製成品質素唔錯，寶麗來concept，仲可以係相上面自己加句子，而最最最最抵讚係效率勁高，艾菲前晚凌晨三點幾先落order，今日下午已經寄到信箱，超Good﹗



打開信封之後會見到一個橙色信封，上面大大隻字寫住Printic，另外仲有張小單張，寫住ner user用'MAILLOVE'呢個code可以有兩張free prints。



不過查媽美子同NT哥哥之前已經share咗佢哋個code，只要第一次落order時入個promotion code落去，就會有$55嘅credit，大概可以曬到10張相，艾菲當然有大食大啦﹗

試用：SHISEIDO Urban Environment UV Protector Extra Mild SPF30 PA+++

正所謂一白遮三醜，艾菲雖然天生白底，就算曬黑咗都好快白返，依然著重防曬呢一環，由讀中學時已經開始日日做足防曬措施先出門口，而眾多品牌之中最有信心就係SHISEIDO啦，全因三年前嘅北海道之旅天氣實在太好，睇住自己D手腳用咗防曬都變咗鴛鴦色，忍唔住買咗枝SHISEIDO ANESSA來即用，膚色先終於keep住無再黑落去，所以今次收到MyBB.com邀請，試用佢哋一款連初生嬰兒都用得嘅防曬產品同出席一個親子防曬工作坊，艾菲真係超級開心﹗



SHISEIDO Urban Environment UV Protcetor Extra Mild SPF30 PA+++嘅配方溫和到出世28日以上嘅BB，小童同敏感肌人士都用得，佢採用咗獨家SuperVeil-UV360TM技術，可以360度抵禦UVA同UVB嘅傷害，重點係不含紫外線吸收劑，酒精，香料或者防腐劑，大人同BB都可以放心使用，來緊艾菲同燒腩仔去旅行，帶一枝就可以兩母子齊齊防曬，終於唔使再好似以前咁佢一枝我一枝咁麻煩啦﹗



艾菲平日就算只係同燒腩仔落街行吓都會同佢搽防曬，或者好多人都覺得BB仲細唔使做防曬，又或者大家會係帶BB去戶外活動時先搽防曬，但睇完上面呢條片你就會明，無論陰天晴天室內室外都好，紫外線係防不勝防，所以防曬真係要由細個開始做起，等佢哋培養出一個習慣，到大個先會識得好好保護自己嘅身體。

K1報名預備篇

這邊廂才剛confirm燒腩仔的PN位，另一邊廂又要開始準備今年K1報名的事宜了，由於燒腩仔即將就讀PN的學校早已講明不會有直升這回事（咁當然係到讀緊PN嘅話再考K點都有D優勢），再加上我們都不想燒腩仔讀全日班，所以今年K1是要來認真的了﹗



相信大家都知今年報幼稚園有新玩法，教育局為確保一人一學位，家長要提早在今年7月至8月期間，替小朋友申請2015/16年的學券，並在明年1月22至24日的統一註冊日內，用學券作註冊留位用，聽聞有部分沒有學券資助的幼稚園也會用學券作註冊留位，所以大家就算不打算讓小朋友入讀學券資助學校，都建議要先申請學券來買個保險呀﹗

而今年的學券申請表格是淺紫色（右邊那張），艾菲這套是到燒腩仔的學校開家長會時拿的，一套有小冊子介紹學券和收生安排，一份申請指引，和一張底面兩頁的申請表，如果大家還未有表格，可以去就近郵局和民政事務處索取，或者到教育局的網頁下載，表格都只是填基本資料，連同身份證明文件副本寄回學生資助辦事處，大概11月便會收到學券。

21個月

嘩﹗又到七號啦﹗即係我又大一個月啦﹗唔知係唔係因為我開始咗一星期兩日嘅游水班，加埋本身一星期一日嘅playgroup，同爸爸放假時嘅一堆豐富節目，搞到我好似日日都唔黐家咁，連媽媽都覺得呢個月D時間過得特別快呀﹗



今個月嘅飲食狀況都無咩點變，照舊一日四餐夜晚無飲夜奶無食宵夜，早餐就飲七安奶加其他包餅或者cereal同糊仔，午餐晚餐食BB專用飯，不過最近天氣熱 同出牙搞到無咩胃口（艾菲：但宜家隻牙仲係完全無影，只係見佢成日流口水用手指撩個口同搵嘢咬先估佢應該係出牙），由上半個月一餐食一碗半飯，減到最近食到一碗飯媽媽都已經收貨讚我叻，至於下午茶就食零食加水果。

智樂社區大自然遊戲日＠寶康公園

一直都有留意智樂的活動，上星期見他們的facebook page有update，於剛過去的星期日在寶康公園舉行智樂社區大自然遊戲日，雖則它們的介紹說活動對象是3-12歲的兒童，但部分遊戲其實都適合已經識行識走活動自如的燒腩仔，難得地點都相當就腳便決心要帶燒腩仔去見識一下。



到達公園後，燒腩仔見到公園門口的遊樂場即忍不住「嘩」了一聲超想過去玩，甚至不願意跟艾菲過去智樂那邊，再加上燒腩仔慢熱的性格，以及參加的人數比艾菲想像中還要多，他起初是甚麼遊戲也拒絕參加， 好不容易才成功令他拿起草地上的人型積木玩呢﹗



見他warm up完便帶他去另一邊田園音樂會，但任憑艾菲怎樣示範和講解，觀察型的燒腩仔還是要小心翼翼地看罷其他小朋友怎樣玩，才肯嘗試自己動手敲打物件。

黃昏時段＠佐敦谷公園

自從燒腩仔懂得自己行路之後，就算艾菲未必能夠天天帶他去公園玩，周末周日假期都總想帶他去公園放放電，接觸一下外邊的世界呼吸清新空氣，畢竟玩是小朋友最大的權利，但最近的天氣實在太熱，要艾菲和米高在這些天帶他去暴曬實在有點頂不住，所以我們都轉了在黃昏時段約五、六點才出動，讓他睡醒一覺午睡玩一會兒再去吃晚飯。



就在剛過去的星期六，燒腩仔下午五點睡醒後我們仍未想到去那兒玩好，眼見時間一分一秒地過，為免太晚出門口會天黑，只可選擇比較就近的公園，於是在九龍灣公園與佐敦谷公園之間我們選了後者，心想就算遊樂場太多人，都有整個山頭讓燒腩仔走動嘛。



差不多六點才到公園，結果卻是出乎意料之外地少人，公園門外排隊等泊車的車龍不見了，大草地上的人也是疏疏落落，就連遊樂場玩的小朋友都不太多，燒腩仔更可以獨霸整個滑梯慢慢玩呢﹗Good﹗