九個月

我...燒腩仔...今日...九個月大啦...啦...啦...為咗隆重其事，媽媽仲專登買咗個蜜瓜蛋糕返來同我慶祝添（其實係艾菲自己想試吓好唔好味）﹗好開心好開心呀﹗

我呢個月嘅生活都係一切正常，三餐奶兩餐固體，早晚兩餐飲七安，下午茶餐就飲五安，至於固體就要食一個大人碗份量。呢個月媽媽畀我試返多D新嘢，食過紅菜頭，合掌瓜，紫菜，芝士，甜椒，桃駁梨，西瓜，星星粉，天使麵同烏冬，因為我已經出咗半隻牙仔，又開始識得咬嘢，所以媽媽開始無將全部食物打成蓉先餵，又畀我試食印度餐自己執來食，嘩﹗原來印度餐好好味又好好玩㗎﹗（艾菲：唔使你善後梗係好玩啦）

至於瞓覺方面就繼續每朝九點半起身，跟住四餐之間瞓三次晏覺，每次一個鐘左右，出街就可能只係瞓半個鐘，叉足電就可以由旁晚七點一直玩到夜晚十點半先瞓。媽媽話我最近開始有好轉，宜家佢只要畀個奶咀同條Taggies我拎係手，然後抱住我攬我一陣我就會開始知道要瞓，咁佢放我落床之後我就會乖乖合埋眼瞓覺少咗要佢勞氣，而且都少咗半夜忽然爆喊，等佢同爸爸可以有覺好瞓。

我呢個月嘅活動能力又進步咗啦﹗除咗爬快咗同企起身後識用pat pat落地之外，我仲由之前要扶住傢俬行進展到推住學步車可以自己行到一陣，不過自己咩都唔扶企就只係企到兩秒咁大把，因為我已經可以隨心所慾想去邊就去邊，想拎乜就拎乜來咬，連技安我都完全唔怕，所以媽媽已經將我個名由自由行正式改為甩繩馬騮，嘻...我係唔係好叻叻呢？

最近我開始學識開合手bye bye，不過都係睇心情，無mood我係唔會理你㗎（艾菲：懶你就懶啦﹗），但拍手同Hi Five都仲係未識只會望住笑，Kiss更加會擰歪面添﹗手指已經靈活到可以執起地下嘅頭髮或者一粒塵，搞到媽媽要日日好努力咁清潔屋企。最近D BB話越講越多，有時仲會用高音唱歌，心情好時會叫爸爸，心情唔好我就會喊住叫媽媽，有時玩玩吓會講哎吔。

至於認知能力我都有明顯嘅進步，開始會留意D細微嘢，例如有時我會研究playmat D公仔有咩唔同，又會發現到婆婆屋企D吊飾唔同咗不停望，去到姨媽屋企開射燈後又好鐘意追住地下D影來玩...見到爸爸媽媽執袋換衫我會知佢哋準備去街，如果佢哋唔預我我一定會嘈㗎﹗出到街又會認得其他小朋友眼甘甘咁望住佢哋。

差D漏咗講最重要一樣嘢添，就係我已經學識蝦媽媽啦﹗（艾菲：衰仔﹗）只要係佢搶我玩具我一定鬼殺咁嘈，如果係其他人我就會笑住爬過去拎返，如果係媽媽餵太熱或者太慢我都會喊住投訴，婆婆餵我就會笑住口慢慢等，不過其他未餵過我嘅人餵我就唔係好敢食啦﹗嘻...安全第一嘛﹗我仲知道每次激完佢畀佢鬧，用返傻笑攻勢同爬埋去攬實佢，佢就唔會嬲我㗎啦﹗