漫遊西貢

最近天氣總是不似預期，早上大太陽下午忽然下大雨，好不容易等到一個大晴天的星期日，米高說想帶燒腩仔到西貢一遊，還貼心得想好去那裡餵奶和換片，艾菲當然立即收拾好行裝出發啦﹗

此行最主要目的其實是要去食這個fish & chips，我們前後路過這間店鋪三次，第一次太飽吃不下，第二次遇上休息，第三次才終於食到，Yummy!不過因為店鋪太細，只有門外的小量座位，艾菲又一次被蚊咬倒（點解次次都係我中，佢哋兩父子就乜事都無﹗），加上沒冷氣令正在BB車上午睡的燒腩仔熱醒，所以我們只可以匆匆的來又匆匆的走，完全沒時間慢慢享受。

每次入西貢的指定動作——底褲韆鞦﹗公園正正在Fish & Chips店對面，兩個底褲韆鞦，就算星期日人比較多都只是等一會兒便可以玩，用來哄熱醒暴燥中的燒腩仔就最perfect，他每次玩都一定笑到咔咔聲。

玩完韆鞦便放他落地玩這些轉轉轉，上次帶他來時還未懂得玩，現在已經懂得自己站著玩，不過就只喜歡這個啡色白色轉轉轉，隔鄰比較大個的串字和過三關轉轉轉他都不太like。

理應喜歡的滑梯，未知是否滑梯貼著他的肥肉不舒服呢？今次玩得有點不爽的模樣，唯一一次艾菲抱著他玩才肯笑。

去過公園玩後又是飲奶時間，親身入西貢兩次再加上網search資料發現，基本上西貢是完全沒有餵奶和換片設施，天時暑熱又怕艾菲再被蚊咬，米高今次便決定帶我們到運動場看台餵奶，然後到更衣室替燒腩仔換片，雖然都是熱但總好過在公園換片那麼開揚啦﹗

叉夠電後我們便繼續漫遊西貢，路過另一個公園比較多年紀大一點的小朋友，本來都不打算再入去玩，但見有些搖搖馬沒人玩便帶燒腩仔入去，先來一個最近hit爆的衝上雲霄look﹗

飛天之後便要遁地做騎師﹗

星期日的西貢實在是相當熱鬧，特別是碼頭附近，又是自由人，又是船河人，又是放狗人士，海傍還有很多小攤檔賣手工藝，跟平日的悠閒差很遠，所以我們只是閒逛一會兒，讓燒腩仔看一看海便撤退。

幼兒水上安全班~第一回

話都無咁快，燒腩仔已經上咗兩堂幼兒水上安全班， 原先以為幾十蚊貨仔都應該係純玩水勁hea，結果係教練都好認真教小朋友一D基本動作，對佢哋將來學游水絕對有幫助，所以上完第一堂艾菲呢個陪上堂嘅已經 攰到散咗，而燒腩仔就已經學識踢水玩得勁開心...為免出年抽唔中無得再去上堂，艾菲又唔記得晒D基本嘢，都係要快手記低佢先得﹗

第一堂：

我 哋班有九個小朋友，燒腩仔係全場最細，其他至少都有歲半識行識走，單係泳池門口集合加換衫點名聽教練briefing都去咗半個鐘，而每個參加者仲獲分發 一頂泳帽（真係...幾十蚊嘅堂仲送你兩頂泳帽...），教練講明上堂一定要戴泳帽因為有事時claim保險就睇你有無戴泳帽，但超唔鐘意戴帽嘅燒腩 仔...一手就將泳帽拎走...好彩教練話只係家長戴都OK...

入到泳池第一時間就係做熱身，燒腩仔自己企最叻都只係企到廿秒咁大把， 做熱身呢D咁粗重嘅嘢當然係艾菲係後面捉住佢D手同腳代勞啦，熱完身教練就叫我哋放小朋友係池邊坐低浸吓腳等佢哋適應吓水溫先，然後家長落水再慢慢撥D水 上小朋友個身到（由腳一直向上撥直至撥到心口），起初燒腩仔好似唔多like，但見到隔離D哥哥姐姐一齊排排坐又即刻笑晒口好high咁。

見 小朋友ready就抱小朋友落水，大人捉實小朋友兩邊「加拿大」畀佢背對住自己一路來回池邊踢水同用手撥水，等佢哋慢慢浮起身，但燒腩仔邊識踢腳呢個指令 吖，於是艾菲就捉住燒腩仔「加拿大」之餘仲要伸對手去幫佢踢對腳，只係咁樣行咗五分鐘艾菲已經覺得好攰﹗等小朋友知道只要肯踢水人就會係水入面浮嘅道理之 後，就可以畀佢哋反身扶住家長對手來回池邊踢水，但燒腩仔太細個未識踢水所以教練叫艾菲繼續第一個動作，當時艾菲心諗「今日肯定散硬」，好彩燒腩仔後來忽 然開竅自己踢水，艾菲就試吓將佢向住自己，佢果然自己好開心咁踢水踢到自己浮起，叻仔呀﹗

學完踢水之後教練就教小朋友扶住家長係水入面跳，因為個池有0.7米深加上燒腩仔連企都未識企，所以佢都只可以繼續踢水呢個動作，到差唔多落堂教練就叫家長 將小朋友放係池邊坐然後家長係水入面同佢面對面，跟住數123小朋友就由池邊跳落水畀家長接住，嘩﹗呢個動作實在不得了啦﹗玩到燒腩仔笑到咔咔聲，後尾艾 菲都未數123佢已經急不及待要跳落來，就算彈到成面都係水佢都完全唔介意﹗

落堂換完衫我哋無沖身就即刻返屋企，同燒腩仔沖完涼放佢落床就即刻瞓到成隻豬咁，最好笑係米高入房聽到佢發開口夢笑咗一聲，雖然艾菲唔係親耳聽到佢呢一吓笑聲，但已經好感受到佢真係好開心，即刻覺得自己咁辛苦同佢去上堂係值得㗎﹗

第二堂：

做 完熱身就好似上堂咁放小朋友係池邊等佢哋適應水溫，一放燒腩仔係池邊佢好似已經記得上堂玩跳水咁，勁興奮急不及待要自己跳落水，落到水都唔使教已經好開心 咁自己踢水，今堂教練預備咗D膠波叫小朋友追住來吹，等佢哋學吓係水入面要用口透氣，但燒腩仔就只係識得食波，艾菲都完全無佢收。

今堂係 代課教練，佢見艾菲捉燒腩仔捉得咁辛苦，就畀咗塊浮板叫燒腩仔捉住等艾菲無咁攰，但燒腩仔唔係好like塊浮板唔肯拎，仲搞到艾菲差D甩手浸咗佢個頭落水 一秒，最終艾菲都係唔用浮板就咁用手捉佢就算，但明顯浸到頭仔之後佢開始有D不爽，後來教練拎咗D發泡膠條出來圍住小朋友個身，等佢哋自己浮起個身來吹 波，家長就係後尾拉實條發泡膠條，燒腩仔一聽到發泡膠條磨擦嘅「吱吱」聲即時大喊，教練同艾菲點安撫都無用...

最終燒腩仔喊咗半堂，艾 菲已經好努力咁用唔同方法去令佢收聲，試過唱佢最like嘅ABC佢聽，佢收咗聲半分鐘發現自己仲係水入面又喊過，同佢玩跳水佢都唔際，畀個波佢拎住都係 照喊，仲要進展到一轉身見到條發泡膠條就喊，喊到落堂都仲係唔肯收聲，只係落到更衣室畀星星餅佢食時停咗一陣，直至艾菲換好衫揹佢離開泳池佢就即刻收聲， 仲識得係車到撩隔離位個靚女玩，真係畀佢激死﹗

仔呀仔...只係一條發泡膠條你都咁驚...來緊仲有八堂點算呀？？？莫非媽媽要買條返來日日整D「吱吱」聲來同你特訓先掂？

幼兒水上安全班

Yummy Yummy Food (8-9M)

自從燒腩仔上個月出了半隻牙之後，艾菲發現他的咀嚼能力有明顯提升，於是繼上次Yummy Yummy Food (7-8M) 後，又鑽研了一些新菜式給他試，慶幸出來的效果都非常好，大部分都食到燒腩仔「舐舐脷」，甚至艾菲自己試味後都覺得美味過大人餐，哈...其實做媽媽的要求真是很簡單，只要有他這個「餵食仔」支持，艾菲就有動力繼續煮下去﹗

正餐：

繼南瓜忌廉汁後艾菲想到可以用粟米加BB奶做粟米忌廉汁，而粟米忌廉汁最襯的菜式便是魚柳，於是便炮製了這個粟米忌廉鯰魚柳星星粉，艾菲試吃了一啖，跟平日用粟米湯煮出來的粟米魚塊味道一樣香口和好味，食到燒腩仔「笑晒口」呀﹗

食譜：

材料：
星星粉1/3碗（發大之後有大半碗）
粟米1/3條
鯰魚柳1/4塊
BB奶適量

造法：
1. 滾水煮星星粉五分鐘
2. 將星星粉過冷河
3. 用水煮星星粉五分鐘
4. 熄火焗十分鐘讓星星粉索水變淋然後倒去水份備用
5. 蒸熟粟米和鯰魚柳
6. 鯰魚柳壓碎
7. 粟米起粒和少量BB奶倒進攪拌機內打成粟米忌廉汁
8. 將粟米忌廉汁倒進星星粉，再鋪上鯰魚柳碎即成

前陣子在759買到一盒天使麵，艾菲食過發現煮完後非常腍，於是便擔粗粗煮了這個芝士焗肉醬天使麵給燒腩仔試，雖然BB芝士最終沒有溶掉，但撈在一起吃的味道都不錯，燒腩仔畀足面食到「嗒嗒」聲。

食譜：

材料：
天使麵1個（煮出來啱啱好一個大人碗）
豬肉適量
蕃茄1個
黃椒1/4個（亦可用其他蔬菜）
BB芝士半粒

造法：
1. 將天使麵弄碎成1cm長（其實煮完先剪都得，但艾菲覺得煮之前好似細個食媽咪麵咁整碎佢會方便D）
2. 滾水煮天使麵五分鐘
2. 將天使麵過冷河
3. 用水煮天使麵五分鐘
4. 熄火焗十分鐘讓天使麵索水變淋然後倒去水份備用
5. BB芝士切粒備用
6. 蕃茄用滾水煮五分鐘去皮去籽切成蓉
7. 黃椒切粒蒸熟再用攪拌機打成細粒狀
8. 豬肉切粒蒸熟再用攪拌機打成肉蓉
9. 將黃椒粒和肉蓉與天使麵拌勻放焗爐杯，再鋪上蕃茄蓉，最後灑上BB之士粒
10. 放200度焗爐焗10分鐘左右至芝士溶化或變金黃色即成（如果BB大個D食到大塊芝士可以用片裝效果會更好）

見燒腩仔食天使麵食得不錯，艾菲又碰巧煲了蕃茄薯仔紅衫魚湯，於是便心思思想讓燒腩仔試食烏冬，但就不敢讓他吃噹噹那種粗身烏冬，而是759買到的正宗日式幼身扁烏冬，未知是湯底好味還是他喜歡吃烏冬呢，他全程一啖接一啖食到無停口﹗

食譜：

材料：
烏冬半紥
紅衫魚肉
蕃茄薯仔蓉適量
湯底適量

造法：
1. 將烏冬弄碎成1cm長（都係煮完先剪都得）
2. 滾水煮烏冬五分鐘（按包裝指示）
3. 將烏冬過冷河
4. 用湯底煮烏冬五分鐘， 熄火焗十分鐘讓烏冬索水入味變淋
5. 加入蕃茄薯仔蓉和紅衫魚肉即成

某天路過誠品打書釘時見到copy cat再改良出來的滑滑豆腐茶碗蒸，因為用日本豆腐所以勁香豆腐味，但燒腩仔就完全不懂欣賞食到叫救命，艾菲和米高都估他大概是嫌這道菜不用咀嚼吧。

食譜：

材料：
日本絹豆腐150g
蛋黃一隻
水一湯匙（原食譜是用高湯）

造法：
1. 將豆腐去水壓碎成蓉
2. 加入蛋黃和水拌勻
3. 將豆腐糊倒進蒸碗蓋上錫紙
4. 隔水蒸10-15分鐘左右即成

註：因為健康院書仔建議BB一餐只食半隻蛋黃，所以艾菲將佢分成兩杯來蒸畀燒腩仔食兩餐

零食：

燒腩仔食生果的反應OK，但食甜品則像艾菲一樣只是普通like，餵他一定會張大口吃，但就不會表現出大愛的反應。

之前上網看嬰兒食譜見到已經超想造南瓜BB奶布甸給燒腩仔吃，但原食譜用魚膠粉艾菲又怕對BB不好於是便一直沒有試（始終係化學嘢），後來醒起粟粉其實可以代替魚膠粉令南瓜牛奶糊凝固便膽粗粗去試，卻白痴地忘記粟粉水要先煮熱再冷卻才會凝固，於是要試做第二次才成功。

食譜：

材料：
南瓜75g
BB奶75ml
粟粉1湯匙

造法：
1. 南瓜蒸熟加入BB奶用攪拌機打成南瓜BB奶糊
2. 用少量凍水將粟粉開成粟粉水加入南瓜BB奶糊拌勻
3. 用隔水或明火方法加熱南瓜BB奶糊
4. 一直攪拌至奶糊變稠
5. 倒進已消毒器皿放雪櫃雪至凝固即成

註：食嘅時候千祈唔好加熱，因為會溶返變水，如果唔想凍食就咁拎出來放到室溫就OK



因為買了一袋日本蕃薯食極未完，所以造了這個蕃薯BB奶布甸，味道跟之前造的BB奶燉蛋差不多，只是多了一陣蕃薯的甜味，亦由於這個布甸沒有隔渣，所以沒有滑嘟嘟的效果。

食譜：

材料：

日本蕃薯一個（細細個那種）
BB奶120ml
蛋黃一隻

造法：
1. 蕃薯蒸熟去皮壓成蓉
2. 加入BB奶和蛋黃，用攪拌機拌勻
3. 將蕃薯糊倒進已消毒器皿並蓋上錫紙
4. 隔水蒸10-15分鐘即成

註：因為呢個布甸係用一隻蛋黃做，所以艾菲都係將佢分成咗兩杯

無意間見到Rice Pudding的簡易版食譜，發現只要將牛奶轉成BB奶，再走糖走雲呢拿香油，成份絕對適合BB食用，所以便試做了一個，艾菲未試過傳統的Rice Pudding到底是怎樣，但這個BB米布甸就有點像爛飯的texture，而BB奶混合米以後有一種純天然的甜和奶香味（艾菲今次用嘅BB奶係美素2號），如果加生果一起吃又是另一種風味。平日我們食飯只要給燒腩仔幾粒白飯他都可以食得津津有味，這個米布甸果然食到他這個「飯桶」如痴如醉，一邊食一邊拍枱要艾菲餵快一點呀﹗

食譜：

材料：
白飯 1 1/2湯匙
BB奶120ml
水蜜桃粒半個（可以不加，亦可用其他生果代替）

造法：

1. 將BB奶和白飯放進焗爐杯
3. 放進180度焗爐焗20-30分鐘左右，期間每十分鐘拿出來攪拌一次，直至米和奶至滿意的稠度
4. 放焗爐焗至表面形成一塊薄膜即成
5. 食用時可隨意加入生果粒

註：如沒有焗爐可用明火加熱，一直攪拌至滿意的稠度即可

燒腩仔的半隻牙仔尚未有力咬牙仔餅，所以艾菲這個月依舊給他食入口即溶的BB米餅和星星餅就算，見健康院書仔教可以將較腍身的蔬果切成粒或片狀給小朋友當零食食，又見燒腩仔的手指拿東西的能力越來越好，所以便做了上面這個奇異果山和甜心蕃薯片，給他試食印度餐自己拿來吃，每次成功將食物由餐盤拿起再放進口之後他都會很滿足地笑，艾菲就會在旁不停拍掌打氣鼓勵。

奇異果山食譜：

材料：
奇異果半個

造法：
1. 奇異果去皮切片
2. 將奇異果片切成三角形（即好似分蛋糕咁切）
3. 將奇異果打直放碟上即成

甜心蕃薯片食譜：

材料：
日本蕃薯一個

造法：
1. 蕃薯蒸熟去皮切片
2. 用餅模切食心形狀即成

書展2013

已經忘記是那一年，去書展逼了一整個下午但甚麼也買不到，再發現外邊書店賣的價錢跟書展的價錢差不多後（通常書展期間各大書店都會同時減價），艾菲和米高已經決定以後不再去逛書展，本來今年都沒打算去書展的，還計劃搭單叫燒腩仔姨媽幫手買布書就算，但碰巧最近正在搜集幼兒教材的資料（因為燒腩仔多數唔會讀N班，艾菲想自己係屋企教佢），才發現繁體中文的幼兒教材不是那麼容易找到，唯有書展的兒童天地會比較集中和多選擇，所以不去不去還是去了。

為了慳入場費和行得舒服一點，艾菲有想過襯米高星期一放假自己拋夫棄子去逛早場（早場入場費只係$10），跟米高商量時他卻不停反問艾菲為甚麼不一起去，既然他都想一起去，那麼便當是一個家庭活動一家三口齊齊去吧，於是我們襯星期五夜場開到12:00，待米高放工在灣仔吃過晚飯才進場，夜場果然是名不虛傳的人頭湧湧，幸好我們帶著燒腩仔可以行特別通道不用兜路和排隊（呢個係點解艾菲咁辛苦都肯帶埋佢去嘅主要原因啦），不用十五分鐘已順利由灣仔地鐵站入到場內。

兒童天地相對沒其他館逼人（但其實都比艾菲想像中多人），行得都算舒服（艾菲全程揹住燒腩仔都行到），因為艾菲此行目的是買繁體中文的幼兒書，所以新雅是艾菲主打target，全場正價書藉八折，印他的facebook coupon可以有七五折，不過艾菲最終都是看不上他們的字卡和BB書而用不著（艾菲之前已經買咗另一出版社嘅字卡），只是買了他們最出名的$100七本以香港情境來寫的德育系列圖書，超想買的《發脾氣》無貨（有個小朋友已經識得發脾氣），唯有因應燒腩仔未來日子可能出現的情況而選擇其他書本（小心觸電同小心窗戶最啱佢啦）。

離開新雅之後，我們便開始逐條wing行（新雅係入口最大個booth），路過栢雅的booth，見全場$100七本艾菲便過了去湧（後來見其他booth都係$100七本而又係賣類似書就無再埋去睇啦），千挑萬選後選了一系列四本教數字，顏色形狀，時間和交通工具的立體書（艾菲覺得幾靚，但一定要同燒腩仔一齊睇，否則肯定好快畀佢整爛），另外買了本《生氣篇》代替新雅買不到那本《發脾氣》，再為湊夠數而買了兩本bed time story（單買$18一本）。

然後行到AML的booth，見有平價英文書我們便又過了去看，最終買了右邊那本硬皮書My Babies（只售$20，同系列有My Friends同My Pets，不過都係類似玩法艾菲就無買啦），以及左邊那本同樣是硬皮書的My First Words，用真實圖片教family，body，toys同animals之類（只售$49，艾菲係淘寶見過類似書平極都做唔到呢個價，仲未計運費同手續費呢），最開心是當晚回家後燒腩仔居然搶著要看這本My First Words，抵買﹗抵買﹗

我們沒有過去另外兩個展館行，本來以為艾菲一定買不到書，但行到最尾竟然見到這本target之一的《百變麵包機》，O...做會員後再折都不過$52一本當然要買，艾菲老早已有買P仔麵包機的決心，只是現在那部香港行貨實在舊得不能接受（function仲要比同model日版少好多），又不想買水貨拖隻大火牛，所以一直等Panasonic返105T行貨，艾菲深信自己一定會等到的﹗（最近呢部唯一嘅香港行貨不停減價，好多BK媽媽都估佢就快返新款行貨）

其實我們原路見到有些台灣和外國圖書都很精美，但價錢就絕不便宜，其中一本艾菲一直在找的布書（activity
book），有齊拉鏈，鞋帶，鈕和扣，標價要$200，八折以後都要$160，艾菲實在捨不得買，不過都剩機見識了Usborne Touch
& Feel和Pop-up書，以及勁多媽媽追棒的Oxford Reading Tree的真身，為日後淘寶做足功課（呢系列嘅書淘寶會抵好多），所以此行雖然辛苦還是值得的﹗

BB芝士

之前見其他媽媽blogger給BB食芝士，艾菲一直心思思想試，但又不知道應該給他試那款芝士，超市亦沒有寫明給1歲以下小朋友食的BB芝士，然後上Baby Kingdom看，有些媽媽又說最容易買到的笑牛牌芝士要九個月才可以給BB吃，反正時間一天一天的過，燒腩仔都快將九個月，艾菲就一心等他滿九個月才試。

然後父親節前一天出席米高死黨gathering，跟其中一個BB的媽媽提及BB芝士，她即介紹艾菲食雪印一排四粒裝每日骨太芝士，說是專門設計給BB，滿六個月即可食用，但就不容易買要到AEON, SOGO, citisuper這些大型超市才會有，而且一有貨旋即被掃光，於是艾菲找遍全港九新界的大大小小超市，最後終於在銅鑼灣SOGO買到。

買回家後再上雪印網頁仔細研究，原來這款芝士有雪印專利含雪印專利MBP乳鹽基性蛋白，有助建立強健骨骼，提昇骨質密度，有助BB出牙，而最重要是這款一排四粒裝，跟一大包芝士球裝是一樣！！！這款芝士球在Market Place都有售呀！還要售價較四粒裝抵（不過前排AEON做特價$19.9一排又比一大包抵）﹗早知艾菲就不用為了它行遍全港九啦...

艾菲現在會給燒腩仔一星期食一粒，每餐食半粒的份量，艾菲自己試過味，不算鹹但跟平日食的卡夫芝士分別不大，但有個缺點是完全不會溶，艾菲已經切粒將它放進粥仔滾都要強行壓扁才叫有些少溶，就算放進180度焗爐焗也完全沒變型，令芝士不能跟食物完全混合。

另一個艾菲心思思想試的便是BB yoghurt，寫明給6個月以上的BB食用，但一點也不便宜，最平可以在citysuper買$6一小杯，百佳則並非間間有（艾菲樓下間就無），而且要一pack六杯買。

Yoghurt又是很有益的食物，不過艾菲很想知BB yoghurt跟普通全脂原味yoghurt的分別，除了糖分比較多以外還有甚麼不同呢？只有九個月大的BB是否只可以食BB yoghurt？很多地方有得買那個Easijo有機自製乳酪又可否給BB吃呢？有沒有有經驗媽媽可以分享一下？

有幾愛？？？

艾菲平生最喜歡的飲品便是維他檸檬茶，讀中學時更是一日一包永無飲厭，由燒腩仔開始對食物有興趣後，艾菲已發現他很喜歡檸檬茶盒，只要艾菲手上拿著檸檬茶，他定必極速爬過來用傻笑攻勢加殷切眼神望著艾菲，意圖感動艾菲賜他一個檸檬茶盒，但狠心的艾菲就一直沒有成全過他，結果之前去Blog Blog BB Gathering便發生了檸檬茶事件令燒腩仔一夜成名﹗

燒腩仔當日望到小檬手上的檸檬茶盒後立即雙眼發光﹗

他的視線完全沒有離開過檸檬茶盒，更意圖及企圖去搶過來﹗

到小檬媽拿開檸檬茶盒後，即露出一個超入戲的O咀表情﹗（呢張相真係每次睇返都忍唔到笑）

Gathering後第二天，艾菲終於忍不住洗了一個檸檬茶盒給他，看他收到之後感動到呢...幾乎眼有淚光呀...

平日像馬騮般無時停的燒腩仔，居然可以坐定定拿著檸檬茶盒玩了大半個小時，期間還要望著檸檬茶盒很high地用高音唱歌﹗那一刻艾菲實在後悔太遲才給他這個檸檬茶盒﹗

自此以後，每次他扭計，艾菲便會送他一個檸檬茶盒，他即時乖乖收聲自己玩大概半小時，甚至有一天他七時多便起床在叫，艾菲在半睡半醒下都是塞了個檸檬茶盒給他便倒頭再睡﹗（佢平日九點半先起身飲奶，通常佢早咗醒我哋都會拖到最早八點先餵佢飲奶）

燒腩仔對檸檬茶盒的愛慕之情幾乎是無容置疑，但艾菲還是貪得意跟他進行了一次測試，去了解燒腩仔對檸檬茶盒的愛有幾深﹗艾菲分別拿出鈣思寶，維他奶，檸檬茶和菊花茶放在playmat，讓他自己去選擇要那一個（因為佢揀得太快所以影唔切），結果...

............................................................


............................................................


............................................................


............................................................


............................................................


............................................................


............................................................


............................................................


............................................................


............................................................

他想也沒想便選擇了維他奶...（唔好以為佢因為size較大所以揀佢，艾菲試過係百佳畀一盒250ml檸檬茶同維他奶佢揀，佢都係揀維他奶）

至於檸檬茶呢？即時變了二奶，玩了一會兒維他奶才記得它，但菊花茶則是由此至終都沒有碰過﹗（估唔到佢又真係識得分檸檬茶同菊花茶係有唔同喎）

唉...事實再一次證明，男人都是天性貪新忘舊的動物，各位小龍女他日擇偶時要小心呀﹗

BB鼻塞點算好？

燒腩仔上星期開始作感冒鼻水長流，但艾菲見佢無發燒，食得又玩得相當精神，所以無帶佢去睇醫生，因為咁細個BB去睇醫生，醫生頂多開D唔太強嘅藥同洗鼻水，最終食完藥都要靠佢自己自然好返，反正屋企有洗鼻水就無謂帶佢去診所，一陣惹埋其他更嚴重嘅菌仲煩﹗

不過咁細個BB有鼻水，其實都真係好麻煩同辛苦，一來佢唔識自己將鼻水「呻」出來，但艾菲用棉花條幫佢吸佢又勁唔舒服喊到拆天咁（艾菲試過用Pigeon吸鼻器係完全唔work，請問有無媽媽用過邊款係work？），所以一日頂多同佢吸幾次，鼻水留係鼻腔入面除咗怕佢會流落喉嚨搞到喉嚨痛咳同有痰外，最怕就係瞓覺時鼻塞到無覺好瞓。

正正燒腩仔今次就係鼻塞到瞓得好差，已經同佢吸完鼻水洗埋鼻先畀佢去瞓，但晏覺瞓唔夠一個鐘就會醒之餘，平日一覺由十一點瞓到九點半，病咗呢幾晚就每隔兩個鐘左右醒一次，仲要好明顯咁聽到佢個鼻好多鼻水，每次初初醒時佢都好努力咁轉身，嘗試搵個舒服D嘅位繼續瞓，但努力過後都係塞住瞓唔到就唯有爆喊，真係聽到艾菲勁心痛，所以上網search吓有無咩可以幫到佢。

BB太細唔用得薄荷膏呢D通鼻產品，但原來洋蔥有天然通鼻效用，BK媽媽教可以切半個洋蔥放床頭，於是艾菲即刻叫菲媽幫艾菲買（咁啱返娘家），點知夜晚返屋企時竟然唔記得拎﹗仲要係燒腩仔瞓覺時先發現﹗半夜三更仲去邊搵洋蔥呢？好彩屋企雪櫃長期放住一盒切咗粒嘅紫洋蔥（因為我每餐都會加少少落粥仔到畀燒腩仔食），咁就即管試吓切咗粒嘅紫洋蔥work唔work啦﹗

艾菲將大概兩湯匙嘅洋蔥粒放入茶袋，再放係燒腩仔床頭即艾菲張書枱，因為燒腩仔同我哋同房，於是我哋就一家三口齊齊聞住呢陣洋蔥味瞓覺（陣味其實唔係好勁），點知到咗一點幾佢依然因為鼻塞而爆喊醒，米高即刻話唔work（佢係唯一嫌成間房都洋蔥味嘅人），艾菲當然唔甘心就咁放棄啦，所以今次安撫完燒腩仔再瞓之後就將包洋蔥放係佢枕頭隔離，然後燒腩仔竟然好安靜無鼻鼾咁一覺瞓到五點幾六點（佢之前鼻塞一定有鼻鼾聲），自然醒無爆喊亦無聽到鼻水聲，再氹佢瞓返之後仲可以瞓到九點半艾菲叫先肯起身﹗

雖然米高唔係好認同，但艾菲就覺得D紫洋蔥唔多唔少都對燒腩仔有D幫助，第二日艾菲再上網爬吓文睇吓關於洋蔥嘅資訊，好多文章都話洋蔥係寶，食落肚有益之餘就咁切開放係到都有用，重點係佢陣味，除咗對舒緩鼻塞有幫助，仲有寧神安睡嘅功效添﹗因為艾菲覺得普通洋蔥陣味強過紫洋蔥好多（艾菲每次切普通洋蔥都一定會喊，但切紫洋蔥都頂到唔喊），於是第二日就買咗個普通洋蔥來試。

同樣將個洋蔥切粒入茶袋放燒腩仔枕頭隔離（因為艾菲覺得切粒之後個味勁個就咁切一半，同一包茶包咁放枕頭側邊方便過放半個洋蔥），果然陣洋蔥味濃烈到米高一入房就問係唔係煮緊飯（又來晦氣話），而燒腩仔就瞓得OK甜，期間有試過半睡半醒咁叫咗幾聲同意圖爬起身，但轉個身搵到個舒服位又即刻瞓返，一覺由十一點瞓到九點半，即證明洋蔥通鼻塞呢個方法係堅work㗎﹗

另外為免燒腩仔鼻水倒流喉嚨痛或者變成痰，艾菲每次發現佢有鼻水後都會用洗鼻水幫佢清潔鼻腔，屋企枝海豚嘜頭洗鼻水係燒腩仔兩個幾月第一次病時朋友介紹，全天然成份連BB都可以用，後來無意間發現洗鼻水係外國原來好common，初起感冒即用以防病情嚴重下去，之前有次燒腩仔又係作病流鼻水，艾菲都係用洗鼻水同佢噴咗幾日佢就自己好返，艾菲覺得都真係work㗎，至少佢已經流咗幾日鼻水就算間中有一兩聲咳都好清聽得出無痰，咁當然病情好嚴重同發燒時就一定要睇醫生食藥啦﹗