13個月

媽媽今次真係超級過份呀﹗明明人哋月頭已經足13個月，佢居然等到月尾先畀我出場﹗諸多理由又話最近好多私務忙，又話哥哥開始放暑假無時間，又話要開始準備哥哥升小一嘅嘢，最後仲出埋絕招忽然病咗要小休兩日，搞到我差D以為要等到14個月大先有得見大家呀﹗



難得有得出場，等我快手回顧吓我嘅進度先，去完健康院見姑娘後，媽媽就話可以試吓再減一餐人奶，除咗早晚一餐埋身食奶外，宜家有時出街玩佢下午就唔餵我，不過喺屋企為咗想我快D瞓晏覺都仲會埋身餵，咁我下午都唔係好大奶癮嘅，有得食固然開心，無得食都唔會特別搵（但早晚夠鐘就會自己搵食）。

阿哥整餅之一口小米通

有日同燒腩仔坐巴士，咁啱睇到Roadshow教整米通，即叫都OK鐘意整嘢食嘅燒腩仔一齊睇，點知佢睇完就不停叫艾菲同佢一齊整，雖知整容易食唔容易，一家四口實得三把口，整完食唔晒就浪費嘛，終於拖到BB豆豬五月開生日會，多D人一齊食就可以整啦﹗



生日會前一日下午，艾菲扑暈BB豆豬即同燒腩仔開工，呢個小米通所需嘅材料唔多，牛油少許，小棉花糖一包（大都得，不過溶會花D時間），cereal適量，同小紙杯或者食物盒，其實份量真係好隨意，因為呢個組合點整都一定唔會難食，嘻...



首先溶咗D牛油，再倒成包棉花糖落去搞溶佢，之後就可以加cereal落去撈勻，由於艾菲用嘅卡樂B cereal本身已有乾果，所以唔需要後加任何嘢就直接入得模，如果普通cereal又想有咬口D的話可以加少少堤子乾之類再入杯或入盒（用食物盒的話記得放牛油紙喺底），然後將D米通放雪櫃雪一個鐘就大功告成。

一拖二之旺角半天遊

平日艾菲一拖二多數喺自己區附近出沒，又或只係帶燒腩仔返學同上興趣班，頂盡返娘家但一定有屋企人接應，再唔係就係過海接米高放工，來到復活節假期嘅最後一日，明明玩足四日話要喺屋企抖抖，等燒腩仔返學前收心養性吓，不過為咗幫佢換季買校服，艾菲居然一拖二出咗旺角同兩個小朋友來個半天遊。



出發前都十五十六掙扎咗成個朝早，眼見D家務清得七七八八，燒腩仔呢日嘅表現又尚算良好，於是食飽午餐就gogogo，半天遊嘅第一個景點就係雀仔街，其實艾菲咁耐以來都未入過雀仔街，之不過賣雀賣蟲呢D嘢，以前細個屋企樓下街市都有得睇，但對燒腩仔來講就絕對係新鮮事。



雀仔街地方唔係好大，一行入去就好似入咗另一個世界咁，周圍都係雀同雀同蟲同籠，我哋漫無目的咁四圍行吓睇吓，講真艾菲對雀鳥嘅知識實在唔多，可以教到燒腩仔嘅亦唔多，只係基本嘢都勉強解答到佢，例如D人點樣養雀，D雀食D咩，同點解要個籠呢D囉...