全埋身之感動

世事有時真係好奇妙，正當艾菲開始寫上一篇講作為全泵媽嘅心路歷程時，BB豆豬就忽然肯埋身食，講緊嘅唔係啜幾啖就喪喊推開艾菲，或只當艾菲奶咀啜完唔夠半個鐘又喊食嗰種，而係真真正正食到一餐，食飽仲識笑晒口吹晒口水波撩人玩嗰種，堅係兩個幾月以來第一次，然後我哋練習再練習，經過兩個幾星期嘅努力後，BB豆豬已經可以全埋身，艾菲終於可以脫離全泵媽嘅行列啦﹗YEAH！

自從第一次閃過放棄餵母乳嘅念頭，艾菲已經接受BB豆豬係個唔鐘意埋身食嘅BB，所以都無乜點再同佢試埋身食，除非大家心情都好輕鬆，時間又許何先即管試吓，直至BB豆豬兩個月大艾菲返Dr Wong到做最後一次產後覆診，講開BB豆豬唔肯埋身食嘅問題，Dr Wong係貫徹始終咁講「餓佢一兩餐就自然埋來食㗎啦」（識佢咁多年已經聽過呢句說話N咁多次），佢話艾菲係唔夠狠心所以輪咗畀個樽，唔...或者都係嘅，要忍受住BB豆豬餓到拆天鬧人嘅喊聲，同時招架專門趁亂鬧事嘅燒腩仔，艾菲寧願餵樽息事寧人KO其中一個先。

跟住個weekend咁啱米高得閒，一早帶咗燒腩仔去圖書館等艾菲可以抖吓氣，艾菲心知呢個係個好機會，勇到專登唔泵奶就叫醒BB豆豬食（咁其實雪櫃都有枝半夜泵落嘅奶嘅），諗住早少少畀佢食心情會好D應該肯啜吓，點知都係啜都未啜就爆喊喪推艾菲，咁艾菲就一於狠心D放低佢由佢喊陣，喊到夠鐘飲奶再抱佢埋身，繼續爆喊喪推唔肯啜，不過就餓到多咗個動作，就係迷迷糊糊咁伸個口埋來舐，𠵱﹗肯舐即係肯試啦...但又舐極都唔肯啜...突然叮一聲艾菲醒起之前喺FB母乳谷有媽媽講過，可以試用乳頭盾來幫BB一把，即刻拎返對燒腩仔年代買落，只用過一兩次嘅乳頭盾出來，擠D奶落去再套落自己到，然後...然後...BB豆豬舐吓舐吓...終於肯啜啦﹗

全泵媽的堅持

打從BB豆豬未出世，艾菲已經一心諗住畀佢做母乳寶寶，有過燒腩仔嘅經驗，艾菲知道自己算係富媽媽，只要肯餵奶係唔會唔夠，唯一要小心唔好再搞到乳腺炎含膿，而最佳嘅避免方法就係畀BB豆豬埋身食，等自己嘅身體慢慢調節適當嘅奶量，偏偏BB豆豬同燒腩仔一樣，艾菲一上奶即唔肯再埋身，艾菲喺無奈之下再一次成為一個全泵媽。

BB豆豬點解唔肯埋身食，艾菲多多少少都估到原因，一來艾菲谷奶時乳頭變硬變短確係難啜，二來出奶太快飲唔切易續親，換轉係自己都寧願揀易啜嘅奶咀，所以艾菲對於再做全泵媽初時都無咩唔開心，只係堅持每餐都試吓埋身先餵樽，深信等佢大D有氣有力D，總有轉返全埋身嘅一日。



為咗keep住奶量，艾菲會喺BB豆豬飲奶前一個鐘泵奶，就算半夜都會較定鬧鐘起身泵，確保佢每餐有新鮮奶飲，起初我哋係餐泵餐飲餐清，問心唔係完全無壓力㗎，不過到咗BB豆豬七日大，艾菲開始儲到奶，情況就相對輕鬆咗，至少唔使驚泵奶時出意外倒瀉奶，搞到BB豆豬無奶食先啦﹗（想當年真係試過兩三次甩手倒瀉大半枝奶>.<）

兩個月

話咁快我已經兩個月大啦﹗為咗紀念呢個咁重要嘅日子，媽媽同哥哥特登安排我同伍餐肉哥哥一齊影相，媽媽話哥哥當年都有咁樣同伍餐肉哥哥影相㗎，佢哋想我延續呢個傳統喎...



我宜家一日食五至六餐，全人奶用樽餵每四個鐘食150ml，開始越來越唔肯埋身食，成個月都只係成功埋過兩三次身，仲要係瞓到矇矇鬆鬆嘅情況下當媽媽奶咀咁啜住瞓咋（無一次食到一餐），一清醒即爆喊推開媽媽（艾菲：好傷心，嗚...），媽媽開始擔心我再大D會更加唔肯埋身，甚至有時會心灰意冷到想放棄餵人奶（艾菲：特別係之前奶量忽然急跌個星期），但眼見我對節瓜腿成功谷多一節出來，頭圍身長同體重都跟住自己條成長線有所增長，又覺得應該再堅持多一陣。

一湊二之苦與樂

又失蹤咗大半個月，明明有好多嘢想blog，但陪月走咗之後，堅係一個人湊住兩個小魔怪，每四個鐘一個循環，要計準時間做好泵奶餵奶洗奶樽沖涼陪瞓陪玩等等等等嘅大小事宜，再加埋一日要煮兩餐飯（本來打算hea食就算，點知一食唔夠奶量即跌，即唔煮唔食唔得>.<），D時間真係好唔夠用，尤其係BB豆豬仲未戒夜奶，真係有時間都寧願眠一眠，確保自己夠精神同佢兩個搏鬥，變相私人時間就越來越少...



其實唔覺唔覺BB豆豬聽日就兩個月大啦，但喺寫佢嘅成長日誌前，艾菲好想寫咗呢篇苦與樂先，皆因日日對住呢兩個高需求嘅小魔怪，艾菲已經攰到無咩精神同佢哋玩，有時又會畀特登搞事唔合作嘅燒腩仔激到暈低咁滯，不過見到佢兩個嘅互動時，又會好感恩自己生咗一對小寶貝出來，成件事唔知點解可以係咁矛盾。



之前都提過，BB豆豬出世後，燒腩仔明顯有D行為問題，艾菲同米高用咗大半個月時間，佢總算安定落來，但安定唔代表完全無嘢，畢竟都只係個三歲半多D嘅小朋友，有D大道理仲係似明非明，而且佢性格係比較自我，好多時想佢參與幫忙照顧妹妹，佢偏偏講反話話唔想做走咗去，叫佢細聲D唔好嘈醒妹妹，佢就專登大大聲喺妹妹側邊大叫同唱歌，等到妹妹醒咗爆喊即若無其事咁走咗去，又會成日搞妹妹D玩具扮BB，有日艾菲喺廚房煮飯，咁啱妹妹扭抱喊，佢第一時間衝入房開妹妹個床鈴，當你好開心以為佢開來氹妹妹時，入到房就發現佢原來係開畀自己玩，仲成個人瞓咗落妹妹張床到，嗰一刻真係唔知好嬲定好笑呢﹗