六個月

嘩﹗發生咩事呀？爸爸媽媽今朝一起身就同我講生日快樂，仲專登拎咗兩件蛋糕返來同我慶祝（實情係艾菲同米高剩機去拎蛋糕食）﹗乜我咁快就半歲啦？係唔係真㗎？我仲係BB來㗎喎﹗

呢個月我嘅最大改變就係開始咗食固體食物，奶量就keep住5.5安無增長（只係食剩嘅次數減少咗，其實有無需要加㗎？），而媽媽就幫我轉咗個新schedule，宜家我每日九點半先起身食第一餐奶，跟住玩一陣就會瞓返，之後十二點起身沖涼同食糊仔，抖半個鐘就食果蓉，兩點前一定會瞓第一次晏覺，呢一覺我開始瞓少D，大約一個鐘左右就會起身玩，然後四點半食完奶五點半就一直瞓到七點半爸爸放工返來先肯起身，大人食完飯就輪到我食八點半餐奶，呢餐奶之後媽媽只會畀我瞓半個鐘就叫醒我，到十一點半我就會飲最後一餐奶然後乖乖地去瞓。

至於食固體食物方面，我食咗個幾星期糊仔就可以代到一餐完全唔需要補奶啦，初初我都唔識飽㗎，媽媽開幾多奶畀我都掃晒，搞到下一餐奶唔願食，咁媽媽就唯有逐少逐少咁同我減奶，到忽然有一日佢唔再畀奶我飲我又OK喎，咁就開始每日飲少一餐奶啦﹗短短三星期我已經試咗好多嘢食（艾菲係無跟足每樣食物試三、四日先試新嘢嘅法則，大概兩日左右我就會畀一樣新嘢佢食），全部都係生果同瓜菜（食咗咩之後會開一篇講），媽媽話我足六個月就可以開始食肉，食得好就會煲粥仔我食，再之後就要一日食兩餐固體食物，嘩﹗好似好正咁喎﹗

吖﹗仲有呀﹗我呢個月最大嘅進步就係學識咗反身啦﹗我宜家唔使一秒就可以反到身扒係playmat到，尤其係媽媽同我換片時，佢一除咗條片我就好自然反轉身想走佬，搞到佢要用暴力將我反返轉先可以著返條片﹗（艾菲：）係playmat到滾來滾去亦已經變得無難度，爸爸媽媽仲成日話我出界夾硬捉返我入playmat添，但爬就只係識得向後爬，發極力都係向唔到前囉...

由於我未夠五個月大已經成功爆睡袋而出，再加上我學識反身之後硬係要圍住張床碌來碌去搞一大輪先肯攬住個床圍瞓（右下圖），就算媽媽會等我瞓著時將我反返正，但我都會瞓瞓吓又突然半夜扒咗係到，搞到媽媽大叫無覺好瞓兼頭痛，然後佢係小檬媽嘅啟發下，決定去搜尋一D全拉鏈無啪鈕嘅睡袋畀我著住瞓，結果我就從此被困，乖乖就範每晚扭一陣就會正正經經咁打平瞓。

除咗繼續喪流口水，狂啜手指同乜都塞落口試味之外，我最近唔使人抱住都可以自己坐到半分鐘（因為又要驚佢跌，佢本身又郁來郁去，所以暫時影唔到相），同埋已經唔滿足於只係坐係到，成日扭計要大人抱住畀我企同學大人行（佢對腳真係勁有力），最鐘意有人同我玩up and down同swing。

至於認人方面，我暫時都只會係見到陌生人時皺吓眉頭，唔鐘意都唔會喊只會keep住皺眉頭，但都可以畀佢抱一陣嘅，見到爸爸媽媽當然會笑，但只要有人同我玩，我唔使佢哋係到都OK（第時佢識行識走艾菲都要睇緊D佢先掂，佢咁嘅款應該好容易畀人拐咗去）。

雖然我好似都幾乖，但媽媽就話我呢個月扭計咗好多，因為宜家一無人理我就會喪喊投訴，搞到媽媽一路做家務都要keep住同我玩peekaboo先掂，而且有時瞓醒晏覺我會合埋眼發狂喪喊，要爸爸媽媽攬住呵我一陣先肯收聲，媽媽話我半夜有時都會瞓瞓吓係到喊要佢拍吓我先收聲，佢跟住就會襯朝早飲奶時問我係唔係發惡夢，嘻...都過咗咁多個鐘我仲邊記得喎﹗