一個月

Hello! 咁耐無見大家有無掛住我呀？唔覺唔覺我已經一個月大啦﹗喺媽媽嘅悉心照料下，我已經擁有一對小節瓜腿，媽媽話佢來緊會繼續全力谷肥我，誓要令我對腿變得更肥美更好咬咁話呀﹗



我宜家一日食五至六餐，全人奶用樽餵每四個鐘食130ml，暫時仲未有轉返埋身食嘅意思，亦未有戒夜奶嘅意慾，係就係辛苦媽媽做全泵媽㗎啦（艾菲：每餐泵連餵有時要用成兩個鐘>.<），但勝在食得痾得又瞓得好吸收，上星期滿月返健康院打針兼拎成績表，相比出世時足足重咗成kg，頭圍同體重都跟住自己條成長線上升，D黃亦全面退晒，醫生同姑娘都讚我叻叻豬呢﹗

六國大封相之坐月體驗

終於...艾菲都刑滿出冊...正式坐完月...有返自由啦...啦...啦...

回顧返成個坐月體驗，用六國大封相來形容當中嘅混亂係絕無誇張，真係EQ少D都吐血身亡，連自己都唔明呢D日子係點樣捱過，好彩嘅係萬大事背後仲有米高同燒腩仔婆婆撐住，喊完笑完鬧完之後亦漸入佳景，我們這一家開始適應一家四口嘅生活。



本來想陪月姨姨喺艾菲同BB豆豬出院當天就過來幫手，點知佢話上一個客嘅job未完，要遲一日先可以來到，唯有請燒腩仔公公婆婆捱義氣呢日過來客串，都好彩有佢哋兩個喺到，幫手照顧住已經失咗控幾日嘅燒腩仔，又幫手整嘢畀我哋食，最重要係等艾菲可以安心沖返個靚涼（一諗起D人話坐月唔沖得涼，個人就會十倍忟，天氣咁熱生完又特別怕熱同多汗，邊可能唔沖涼唔洗頭咁唔衞生）﹗



燒腩仔同BB豆豬相認嘅一刻﹗艾菲入院前一直同燒腩仔講，呢日放學返來就會見到艾菲同妹妹，加上燒腩仔婆婆幫手同佢洗腦，所以佢都勁期待見到BB豆豬，喺醫院BB房探妹妹時佢通常望兩望就話走，今次就超級肉緊不停想伸手摸妹妹塊面，而艾菲都把握機會送上妹妹為佢準備嘅見面禮，剩機收買吓人心。