Maternity Photo（35 Week）

影唔影大肚相，係陀BB豆豬之後一直諗嘅問題，上一次陀燒腩仔真係無諗過影，只係臨生前喺屋企自拍咗一張當留念就算，不過今次應該係人生中最後一次有BB，再加上睇返當年除咗同事捉住影嗰幾張之外，真係搵張稍為見到個肚嘅相都無（艾菲本身唔鐘意上鏡），個心就更加想趁今次影返D相來留念，不過要本身都唔多鐘意影相嘅米高，同唔知合唔合作嘅燒腩仔配合艾菲，感覺猶如倒錢落海賭大細咁，而且明知呢段時間係米高公司嘅peak season，未到最後一刻佢都唔會答到艾菲幾時得閒影相，如是者拖吓拖吓艾菲就無刻意去搵人影相，只係盤算住有時間就即管試吓自己影。

然後唔覺唔覺已經來到三十五周，米高喺上星期初忽然話呢個weekend會得閒D，艾菲當然把握時間捉佢哋兩父子去影相，亦好好彩落咗成個星期雨後，到星期六終於出太陽，所以我哋呢朝同燒腩仔上完學校興趣班，返屋企食飯換好衫就即刻拎齊嘢出發啦﹗



燒腩仔：妹妹，你鐘意食咩味嘅糖呀？（真實對白，kakaka...）



睇返全部相，最滿意係呢張，感覺最自然 :P



我們這一家



Big Brother



Big Brother & Baby Sister



艾菲好鐘意嘅綠葉牆背景，可惜有人out咗focus...

行咗三百幾級樓梯，先來到呢個無乜人嘅隱世大草地，可以無拘無束咁影吓相，諗住點都會影到D好嘢，可惜model燒腩仔唔多合作，被逼上場嘅攝影師米高又無乜心機，結果就只係得呢幾張相叫做勉強見得人，搞到艾菲都有D無癮...



不過艾菲又無話失望嘅，一來艾菲只係單純想有幾張相留個念姐，二來燒腩仔呢期D狀態實在太飄忽，勉強始終無幸福嘛，畀咗錢影佢都咁就更加肉赤，三來艾菲個肚實在太細太無氣勢，無論點影個效果都唔夠震撼，四來當然係喺影呢幾張相前一日，艾菲已經趁燒腩仔返學時自己喺屋企自拍咗幾張大肚相啦（因為怕落雨咩都影唔到就自己影定先）﹗



艾菲份人比較怕醜，太sexy嘅自己留念就算，呢張見到肚仔已經係最大極限啦﹗大家覺得還可以嗎？嘻...