行路問題＠第二次物理治療

上次物理治療後，艾菲足足病咗兩個幾星期，喺無王管嘅情況下，燒腩仔當然係無乜練習到姑娘叫佢做嘅雙腳跳，單腳跳同拋波動作啦，不過艾菲好返後眼見覆診期越來越逼近，都間中會捉佢練吓，只係呢個小朋友每次都會推三推四，一句做唔到或者唔想做就剩機走人，搞到艾菲勁無奈。

我哋上星期三，又一家三口準時出現喺物理治療嘅房門外，姑娘一見到我哋就叫燒腩仔入去玩住先，有得玩燒腩仔當然勁hyper，不停拎住個健身大波波推上滑梯再推落來，無耐之後有多個應該大燒腩仔少少嘅男仔都來咗，兩個有樣學樣咁一齊玩，笑到咔咔聲超級嘈。

大概十分鐘後，姑娘就帶住個大過佢哋一年左右嘅姐姐，叫佢哋跟姐姐做叉腰單腳跳同掟波嘅動作，艾菲幾欣常姑娘用呢個同輩嘅方式來教佢哋，可惜燒腩仔之前實在玩得太high，所以係完全無理姑娘，繼續四圍走唔受控（唉...佢返學都係有呢個問題，一玩得癲就收唔返成日唔正經唔聽指令）。

之後姐姐行開做其他練習，姑娘就拎咗個雪糕筒同柱，整咗個矮欄畀佢哋兩個男仔雙腳跳過去，要求佢哋雙腳落地，燒腩仔搞咗好耐先肯認真跳幾吓，其餘時間都係橫衝直撞亂咁來，其實艾菲知佢做得到，偏偏佢就係唔正經唔冷靜，好彩姑娘都理解有幫手勸吓佢。

跳完欄姑娘就叫佢哋唔用扶手直接行樓梯上落，再試吓喺樓梯級到跳落地，跟住就拎咗一大籃豆袋，要求佢哋先將豆袋放腳面，然後用腳踢個豆袋入籃（練習單腳企嘅動作），又係明知燒腩仔做到，佢就玩到癲晒猛用手掟入籃算，終於逼到姑娘要大聲渴佢一聲佢先聽話（真係犯賤）。

最後姑娘好醒咁搵個幾乎高過燒腩仔嘅軟墊隧道套喺個彈床上，再捉燒腩仔入去跳，要佢跳足十分鐘先放佢走，把口好叻嘅燒腩仔當然不停同姑娘講數，keep住話「夠鐘啦」同「跳夠啦」，要姑娘兇佢唔跳要加時先好少少。

事後同姑娘傾返，佢都話畀佢同朋輩一齊上堂，佢會積極少少做多咗動作，但又變咗好似玩咁唔太認真，總結返今次嘅表現，佢雙腳跳係勉強叫做有進步，單腳跳就仲未OK，不過姑娘話三歲半唔使急，而且相對另一個男仔，佢單腳跳時pat pat識得固定先郁，平衡已經算係好，唔使太擔心進度，返屋企如常練習就可以。

同姑娘約定今個月尾再返來覆診後我哋就走（呢到嘅姑娘會就返小朋友同家長時間去約期，佢知艾菲五月頭生所以專登畀呢個期我哋），而放咗成個鐘電嘅燒腩仔亦終於出現疲態，其實出發前艾菲已經同佢講過要聽姑娘指令，仲帶定零食同糖去氹佢，但觀乎佢今次嘅表現，下次艾菲單拖帶佢去覆診前，一定要再認真少少同佢傾吓先得。