住家男包水餃

復活節紅假過後，燒腩仔仲有成個星期先返學，艾菲宜家個肚開始大，加上佢又成日失控，艾菲都唔太敢單拖帶佢去太遠嘅地方玩，頂多落吓樓下平台踩scooter同返娘家搵公公婆婆算，但日日困喺屋企你眼望我眼都唔係辦法，總要搵D嘢來消耗吓佢D精力，然後艾菲就諗到不如同佢一齊包水餃。

艾菲自小就特別鐘意食餃子，無論係日式韓式煎餃還是傳統水餃都好，高峰期可以一口氣食一打落肚，但要艾菲自己包真係唔太曉（一諗起點包到靚一靚就無信心），只係早幾年喺$12店買咗個餃子模後試過一次咁大把，之後都係貪方便寧願買急凍餃子返來食算。



今次要同燒腩仔一齊包水餃，艾菲一朝早就準備好餡料，再預咗成個下午畀佢慢慢玩，點知所有嘢準備好晒之後，先發現米高早幾日幫手買落嘅水餃皮變壞咗唔用得，唯有拿拿臨自己開麵包機同壓麵機整，但第一次自己整水餃皮落得太多水好黏手，搞到旁晚時份先完成到D水餃皮，為咗慳返D時間，本身想叫燒腩仔幫手包幾隻玩吓就算，點知佢真係一個又為食又鐘意自己整嘢食嘅住家男來（佢之前同艾菲講到五歲時要煎蛋畀艾菲食），一叫佢埋位即好認真咁整，堅持要幫艾菲筆餡直至完成為止。

咁艾菲講咗咁耐，到底D燒腩牌水餸係點來呢？好﹗即刻去相﹗



首先要將塊水餃皮放上個餃子模到，輕輕力用手指喺中間篤個碗型出來。



跟住就開始筆餡，一茶匙已經好夠啦，否則會爆餡唔靚㗎﹗



放好餡就喺餃子皮嘅邊到點D水。



跟住將個餃子模合埋，睇吓呢個住家男整得幾開心﹗



話咁易就搞掂一隻啦﹗YEAH！



喺燒腩仔嘅幫忙吓，我哋包咗差唔多四十隻水餃，明顯包得唔太靚仔，仲有幾隻爆咗少少餡出來。:P



咁辛苦先包完D餃子，梗係要即晚煮來食啦，係搞到遲咗開飯，但睇見製成品燒腩仔超開心。



自己整應該係特別好味㗎，呢晚佢一口氣食咗六隻水餃，仲要食多四粒用多出嘅餃子餡做成嘅肉丸添﹗