肥妹仔？（36W）

去完QE見醫生後，話咁快又過咗兩個星期，上星期三我哋又去咗搵Dr Wong，都係米高放半日（本來話請唔到假㗎，好彩最後都請到），同艾菲一齊去接燒腩仔放學，再出發去尖沙咀。

星期三嘅診所，又係冷冷清清咁唔使點等（點解我哋咁遲先發現呢樣嘢），入去照例登記量血壓磅重驗小便，今次血壓小便都正常，上磅發現比三星期前重多咗一磅，即到目前為止只係重咗14磅左右，至於肚圍係無任何進展繼續37寸半，甚至朝早空肚度係跌返落36寸（最近撞到燒腩仔N班同學仔媽咪，都係話艾菲個肚似得五六個月大>.<），最值得一讚係肚皮力保不實keep住零肚紋，Good﹗

登記完問姑娘話等多一個就到艾菲，果然去完洗手間返來已經入得房，Dr Wong繼續循例先問近況，主打係想知艾菲有無肚痛怕艾菲隨時生，佢都提醒艾菲要開始留意有無作動徵兆，宜家已經36W，有咩風吹草動就要入院提早拎BB豆豬出來，仲話如果已經係陣痛子宮頸開咗的話分分鐘要轉返做順產添，不過佢話通常生前幾日D胎動會開始少咗，如果佢依然活躍都唔使太擔心，又建議艾菲呢排行少D，望BB豆豬生生性性等到開刀之日。

問完近況，Dr Wong就轉返去認真mode，拎咗張單張出來講手術嘅過程同風險，傷口會開返上次同一個位，預計時間要半個鐘至四十五分鐘（會比第一次開刀耐），手術前一晚要入院同禁食（即五日五夜），手術後要六個鐘先可以食粥水，到第二朝就可以正常飲食同落床，至於艾菲最擔心嘅宮縮問題（有幾個朋友都話第二胎會痛得勁D），Dr Wong就話只要落夠止痛藥就唔會痛，叫艾菲唔使太擔心同記得痛要出聲。

之後我哋就埋位照超聲波見吓BB豆豬啦，今次Dr Wong都特登check晒四圍嘅胎水足唔足夠，再睇埋胎盤確保無鈣化嘅跡象，然後聽心跳時BB豆豬好唔合作咁不停郁，搞到甩咗兩次先度到，連Dr Wong都話佢果然好活躍:P，至於size呢，頭仔係35W，肚仔係37W，腳仔嘅差距終於拉近咗，但都已經37W5D，平均係37W，已經有6點幾磅，預計過多兩星期應該有七磅，算係大隻B啦﹗

睇完size，Dr Wong就嘗試畀我哋睇吓BB豆豬個樣，今次佢終於無用手遮住塊面，不過由於入面都應該好逼，加上器材關係，所以唔算睇得好清楚，只係見到鼻同咀，眼係完全睇唔清，唯有等見真人先知似邊個（女，你至少都遺傳返媽媽嘅雙眼皮大眼睛可以嗎？），然後Dr Wong好搞笑地睇睇吓喺到偷笑，話BB豆豬塊面好多肉幾好肉地咁，不過都補充一句唔排除只係水腫要等佢出咗來收埋水先可以作實，搞到艾菲越來越期待見呢個肥妹仔呀，哈哈...

照完超聲波，Dr Wong都有問QE嗰邊有無再約覆診，當佢知艾菲今個星期會去健康院做檢查時，就話唔使再返診所呢邊覆診，直接下星期去醫院見就得，然後艾菲都順便問埋B鏈嘅問題，Dr Wong有話37W先喺健康院做有D危，因為一般要等一星期先知結果，不過都話兒科醫生知艾菲開刀無穿水唔經產道生的話，應該唔會太擔心呢樣嘢，well...唯有到時再問問健康院嗰邊幾時有結果同點通知啦（因驗完一星期後都入院啦...）。

臨走前同Dr Wong傾開，佢都有提我哋到時要留意燒腩仔情緒，佢話宜家無謂講太多佢聽，最緊要安排佢到時去醫院見艾菲同BB豆豬，等艾菲可以陪吓佢唔好覺得唔見咗媽媽，而艾菲都好記得佢當年教過，話返到屋企除咗餵奶之外，盡量就唔好理個細只陪個大，希望呢招到實際應運起上來時係work啦，皆因佢宜家D情緒已經開始唔穩定，只可以寄望佢見到BB豆豬真人時會慢慢接受。

見完醫生，出返去等埋封入院信我哋就走得啦，不過艾菲同米高都有同樣嘅疑問，就係點解呢邊每次收錢都咁慢，米高話出來時聽到Dr Wong話趕住走，叫姑娘快D叫下個入去，即我哋封信明明已經搞掂咗好耐，最終都要等成大半個鐘先有得拎（仲要今日診所勁少人喎），就算平日無藥無信只係正常找數，都要等差唔多時間（燒腩仔好多時就係呢個位頂唔住失控），呢樣嘢相比仁安嗰邊真係差好遠呀﹗