復活節假第三日，繼續天氣好到不得了嘅一日，但呢朝有個特別任務在身唔可以出去玩住，就係同燒腩仔剪頭髮，睇見佢畀D頭髮搞到好痕，日R夜R兩邊耳背同頸都損晒流晒血，艾菲真係唔敢再拖到四月先剪，而呢一剪都應該係BB豆豬出世前嘅最後一剪，所以艾菲落手比較狠，但求個頭可以keep到六月艾菲坐完月先再剪。
剪完頭髮同米高夾手夾腳清理好案發現場，中午食飽飯就決定帶燒腩仔出去放吓電兼影吓相，艾菲實在太耐無同佢去公園影相啦，然後喺佐敦谷同觀塘海濱之間，我哋揀咗後者以為會無咁多人，順便為之後可能會自己幫自己影嘅大肚相探探路同試吓位。
由於呢個小朋友，聽到有得去公園玩都仲慢吞吞，扭擰一輪先出到門口，為怕錯過咗最靚嘅夕陽光線，所以艾菲今次唔畀佢去感官花園玩住，一來就同佢行海邊先，不過近觀塘碼頭呢邊，係一如以往咁多人，想影張主角肯笑而背景無腳嘅相，實在有D難度。
我哋一直向住牛頭角方向行落去，以為會少D人好影D，點知一切都只係艾菲一廂情願嘅諗法，可能呢到已經揚咗，越來越多人識來呢到野餐睇日落，就連個草地都甩晒草得返D沙（保養好差），基本上以堅影相來講，艾菲可以直接考慮去第二到影算。
要氹小朋友合作影相，總需要一D法寶，而今次艾菲臨時臨急，就只係帶咗枝吹泡泡出來，不過隨住小朋友年紀越來越大，閃人嘅速度亦越來越快，仲識得同你講佢唔想影，所以要影到D好似細個時，呆呆吹泡泡或拍泡泡嘅夢幻相，真係幻想吓就算，實情係你對焦快得過佢走人先勉強影到幾張，都唔好要求表情動作有無美感啦﹗
呢兩張難得坐定定嘅，都全靠三隻狗仔先影得成，話說艾菲都唔知燒腩仔幾時開始忽然話驚狗，起初以為佢只係講笑，後尾見佢堅係見親狗都縮先信，而呢日正當佢好興奮咁跑到老遠完全唔理我哋，忽然米高就笑到肚痛話佢好快會跑返返來，原來有三隻狗仔喺正佢後面散步仲邊行邊吠，嚇到佢即刻跑返轉頭，艾菲就剩機叫佢坐低等D狗仔走遠，大家睇吓佢當時個樣係幾咁無奈，kakaka...
喺草地玩完泡泡，我哋就走返去海邊散步睇日落，而燒腩仔亦終於發現之前一日玩嘅東華慈善嘉年華就喺對面，仲同我哋一齊坐喺樓梯到睇人玩跳樓機添。
見佢肯坐定唔再四圍跑，艾菲當然捉緊時機叫佢同我哋影吓合照啦，不過佢把口真係堅叻，不停同我哋講數，要我哋畀果汁或糖佢先肯埋位，仲要賴貓唔認帳都唔覺有咩問題，食完飲完就即走佬，所以呢張難得佢嗲豬樣挨住艾菲摸摸BB豆豬嘅相，實在係可一不可再（可惜光線唔太OK）﹗
同燒腩仔玩到日落，再返過去感官花園玩咗陣我哋就撤退，簡簡單單又過咗一Day啦﹗
沒有留言:
張貼留言