自從前年南丫島出走兩日一夜後，艾菲同一班好姊妹就約定，耐唔耐要拋夫棄子全女班咁約出來食個飯見個面（之前次次出親來都一家大細，真係想傾得深入D都唔得），但大家都明艾菲生完BB豆豬，短期內好難再咁樣約出來見，所以特別約咗呢晚出來食飯，而貼心嘅米高為咗等艾菲可以早D出門，就特登請咗半日假返來湊燒腩仔，仲話自己可以順便出trip前抖抖兼執行李，等艾菲無得反對佢呢個安排。
點知...突如其來嘅一個意外，早一日米高whatsapp過來話個trip臨時取消咗，佢把口話就話自己都唔係好想去，實情係佢一早plan咗過到日本點樣偷時間去食好嘢同shopping，話唔失望就肯定係假嘅，於是艾菲就決定做好老婆氹返個老公，約咗佢呢個下午等燒腩仔返學後，去拍拖歎返個平民high tea。
呢間喺油塘大本型嘅Spade，係艾菲之前喺新假期嘅facebook page到見到，$39一個小龍蝦牛角包，同$99 High Tea Set連兩杯飲品（假日就要$149），好似好吸引咁就mark低咗，我哋呢日來到都仲未夠兩點，為免餓親大家就先叫個小龍蝦牛角包來share食，唔...都幾好味喎﹗
等到兩點就即叫個high tea set來扮貴婦，食物唔算好多，味道亦只係不過不失，但以$99呢個平民價來講，艾菲覺得都值嘅，而且呢日嘅重點係難得飛甩燒腩仔呢個電燈膽，兩公婆sweet sweet拍吓拖嘛，真係做乜都特別開心﹗
而艾菲全日最冧冧豬，就係拍完拖返到屋企，明明差不多夠鐘落去接燒腩仔校車，偏偏艾菲就忽然無電瞓著咗，然後米高就不動聲息咁落樓去接燒腩仔畀艾菲抖，返到來仲一手一腳搞掂燒腩仔沖涼換衫，再帶佢去嫲嫲到食飯，等艾菲可以安心同好姊妹，一邊十吓十吓一邊盡情吹水，好好享受一晚自由之夜。
大家都知，艾菲身為一個FTM，每日單係照顧燒腩仔同處理家務，已經可以忙到一頭煙，要咁樣放一日假，兩公婆拍吓拖或者單獨同朋友食個飯，真係得來不易嘅一件事來，所以每次可以自己出門艾菲都特別珍惜，亦好感激身邊有個好老公理解同無限量支持，講真艾菲喺呢三年幾入面都有迷失過，但好彩嘅係好快就醒覺，事事以燒腩仔為先未必係對佢好，反而會為佢同身邊嘅人做成更大嘅壓力，偶然畀自己出去放鬆吓，叉個電返來先會多返D心機同耐性去應付佢，所以艾菲一直都好堅持，每日要撥返D時間出來做吓自己鐘意做嘅嘢，簡簡單單上吓網，寫吓blog，睇吓書，整吓甜品都好，等自己心理平衡吓，希望呢樣嘢到BB豆豬出世後，艾菲一湊二嘅時候仲可以keep到啦﹗
沒有留言:
張貼留言