其實出發前見到又大驟雨又得自己一個單拖帶住燒腩仔，都有諗過打退堂鼓縮沙㗎，但為咗Mrs Wu真係豁出去，今次唔見唔知幾時有得見，而且燒腩仔都好想同小朋友玩（早兩星期妹豬媽喺放學時同佢提過後，佢就不停話自己星期日約咗妹豬同小檬出來玩 :P），來緊BB豆豬出世後都要一段時間先可以同佢出去玩，所以要好好珍惜宜家只得我哋兩母子拍拖嘅時光。
由於預錯咗時間，結果我哋遲咗少少先到，去到燒腩仔有D未warm up唔知點咁，又唔叫人又唔願玩唔願食，好彩有小檬媽第一時間幫艾菲帶咗佢去搵食同玩，之後仲同佢玩鬥唔笑同整古靈精怪樣，佢先好返DD，重點係鬥唔笑呢個game超work，當佢返到屋企扭食糖時，艾菲就同佢玩呢個game，輪咗畀艾菲就要佢做完功課先准食同換咗做DHA軟糖，呵呵呵...
見燒腩仔OK之後，艾菲就好放心咁由佢自己四圍玩，媽媽有媽媽四圍傾偈同撩小朋友玩，燒腩仔就同車迷南瓜仔同一仔一齊玩車自成一角。
後來見差唔多人齊，Miss Wong（小檬媽）又出動帶集體活動，呢個拋毛巾遊戲成功令燒腩仔放低架車一陣，佢返來都好記得呢個game，米高問佢玩咗咩時第一時間就答拋餅餅（因為我哋將毛巾變咗做包餅），kakaka...
玩完集體遊戲就同主角Mrs Wu影返張大合照，不過呢個時候嘅燒腩仔已經唔太受控，第一張係專登拎住包餅遮住自己個樣，第二張係用手檔，第三張直情走咗佬... >.<
影完相，我哋就齊齊過咗去隔離playroom玩，左邊條滑梯勁滑勁快，燒腩仔玩咗肯定唔止二十次，多得大家幫忙喺到維持秩序，小朋友先唔使撞埋一堆，而艾菲亦趁機同主角Mrs Wu傾咗一陣，艾菲真心覺得Hannah同Emma兩姊妹好乖好有禮貎，仲要兩個都好靚女添，只可惜燒腩仔呢日狀態一般又唔願影相，所以唔記得同你哋單獨影返張相來留念呀﹗
艾菲亦想喺到感謝埋每個幫忙睇住燒腩仔嘅姨姨叔叔，因為佢行動迅速到艾菲唔太睇到佢去咗邊到玩，連佢同南瓜仔一齊擒咗上呢個架到艾菲都完全唔知，多謝南瓜仔媽幫忙影低罪證﹗:P
玩到咁上下我哋就返去活動室繼續gathering，可能係放完電開始見肚餓，燒腩仔返來之後係狂食菠蘿腸仔同蛋糕，最後仲掃多個包同成包餅落肚，艾菲亦趁呢個位幫佢同其他小朋友影吓相（唔理得佢個食相衰唔衰啦，hehe...），艾菲想話巨鳳真人比上鏡更cute，完全唔似一個只有一歲嘅小朋友（話佢兩歲都信），搞到艾菲勁想見埋二哥巨鵰呀﹗
食飽叫佢同小朋友影吓相又開始扭扭擰擰，咁艾菲唯有叫佢企喺妹豬姊妹後面攝鏡啦，哈...有得搞事佢實合作。
臨走前終於肯同妹妹豬影返張相，妹妹豬雖然已經有咗新歡，都好畀面咁聽燒腩仔指望吓鏡頭。
呢日真係玩得好開心好盡興，睇住大家嘅小朋友一齊大一齊進步（今次最開心係見到肚B講嘢叻咗好多，有問有答好叻女），感覺真係好神奇，希望我哋下次再有機會一齊出來玩啦﹗
沒有留言:
張貼留言