全埋身之感動

世事有時真係好奇妙，正當艾菲開始寫上一篇講作為全泵媽嘅心路歷程時，BB豆豬就忽然肯埋身食，講緊嘅唔係啜幾啖就喪喊推開艾菲，或只當艾菲奶咀啜完唔夠半個鐘又喊食嗰種，而係真真正正食到一餐，食飽仲識笑晒口吹晒口水波撩人玩嗰種，堅係兩個幾月以來第一次，然後我哋練習再練習，經過兩個幾星期嘅努力後，BB豆豬已經可以全埋身，艾菲終於可以脫離全泵媽嘅行列啦﹗YEAH！

自從第一次閃過放棄餵母乳嘅念頭，艾菲已經接受BB豆豬係個唔鐘意埋身食嘅BB，所以都無乜點再同佢試埋身食，除非大家心情都好輕鬆，時間又許何先即管試吓，直至BB豆豬兩個月大艾菲返Dr Wong到做最後一次產後覆診，講開BB豆豬唔肯埋身食嘅問題，Dr Wong係貫徹始終咁講「餓佢一兩餐就自然埋來食㗎啦」（識佢咁多年已經聽過呢句說話N咁多次），佢話艾菲係唔夠狠心所以輪咗畀個樽，唔...或者都係嘅，要忍受住BB豆豬餓到拆天鬧人嘅喊聲，同時招架專門趁亂鬧事嘅燒腩仔，艾菲寧願餵樽息事寧人KO其中一個先。

跟住個weekend咁啱米高得閒，一早帶咗燒腩仔去圖書館等艾菲可以抖吓氣，艾菲心知呢個係個好機會，勇到專登唔泵奶就叫醒BB豆豬食（咁其實雪櫃都有枝半夜泵落嘅奶嘅），諗住早少少畀佢食心情會好D應該肯啜吓，點知都係啜都未啜就爆喊喪推艾菲，咁艾菲就一於狠心D放低佢由佢喊陣，喊到夠鐘飲奶再抱佢埋身，繼續爆喊喪推唔肯啜，不過就餓到多咗個動作，就係迷迷糊糊咁伸個口埋來舐，𠵱﹗肯舐即係肯試啦...但又舐極都唔肯啜...突然叮一聲艾菲醒起之前喺FB母乳谷有媽媽講過，可以試用乳頭盾來幫BB一把，即刻拎返對燒腩仔年代買落，只用過一兩次嘅乳頭盾出來，擠D奶落去再套落自己到，然後...然後...BB豆豬舐吓舐吓...終於肯啜啦﹗



為咗令BB豆豬埋身食，艾菲之前試過晒唔同嘅餵奶姿勢，試過泵鬆一半先畀佢啜，又試過用杯餵唔畀樽佢食，亦試過畀佢啜幾啖奶樽即轉埋身，仲試過趁佢瞓到迷迷糊糊時畀佢啜，眼見BB豆豬明明識啜亦夠力啜（啜得叻過燒腩仔㗎），好明顯無乳頭混淆，偏偏就係唔肯埋身啜，艾菲唯一諗到就係佢嫌出奶太快續親（初期試過一次啜到續親咳就爆喊唔再啜），所以寧願用樽慢慢飲，點知佢原來唔係唔肯啜而係啜唔實（艾菲無天生奶媽嗰種奶樽乳頭），加咗乳頭盾後佢先啜到。

肯啜同成功啜到一餐，有過燒腩仔當年嘅經驗，艾菲知道大家係需要一D時間去夾同適應，BB豆豬一餐要啜幾耐先夠呢？啜完一餐頂到幾耐呢？到底佢有無啜到嘢落肚呢？有別於其他BB，BB豆豬每餐埋身前總要搏鬥一輪先肯啜，啜完一餐多數都係喊住放開口，咁係代表住咩呢？一日未解答到以上嘅問題，艾菲同BB豆豬都好難輕鬆做到全埋身（其實唔係唔得，只係艾菲會好辛苦好攰，好難同時抽到時間照顧燒腩仔同做家務囉），所以頭兩星期艾菲都只係weekend米高放假，有人幫手睇住燒腩仔輕鬆D，先同BB豆豬埋身搏鬥食一兩餐。

直至BB豆豬開始唔再抗拒埋身食，唔再每餐開餐前都嘈一大輪先食，無再啜到艾菲損同痛，每餐啜35至45分鐘就OK（啜好耐先肯放口，不過總好過用兩個鐘泵奶餵奶），亦由起初一餐只頂到兩個半鐘，慢慢進展到一餐頂到三個半鐘至四個鐘，照舊有濕片有入有出，艾菲就知道we are ready，跟住一個星期我哋就索性全埋身，除咗夜晚最後一餐會泵出來畀米高用樽餵，確保佢夠飽然後一覺瞓天光。

隨住我哋開始轉做全埋身，艾菲呢個全泵媽亦同時要減產去配合返BB豆豬，否則太谷的話對我哋兩個都無好處，不過要一下子由五個鐘已經谷到爆九安大樽嘅奶量，減到每四個鐘五安左右啱啱好夠食，唔太鬆又唔太谷係要D時間，然後艾菲用咗足足一個星期，中間仲有兩日谷到發燒幾乎出事，要不停凍敷忍痛同食panadol打底，先由原先每日五泵減到四泵，再慢慢減到三泵，直至宜家一日兩泵（原則係日頭唔谷就唔泵，谷都只係泵鬆就停，等身體慢慢適應），日頭可以輕輕鬆鬆完全唔使泵，只係夜晚十一點左右同凌晨五點各泵一轉，夠燒腩仔第二朝做早餐，又可以儲少許儲備作緊急用（如果夠膽唔儲奶備用係可以連呢兩泵都慢慢減埋去，但艾菲暫時想keep住先以防萬一）。



全埋身對於普遍母乳媽媽來講實在唔係D咩特別事，但對艾菲來講就係超感動嘅大事，身邊唔少朋友嘅BB都肯埋身食，就連陪月都話未見過有BB會唔肯啜自己媽咪咁奇怪（艾菲只可以話佢見識少囉...），偏偏自己兩個小朋友都唔願埋身啜，個心點都會有D唔好受（特別係之前朋友帶埋小朋友來探艾菲時，同小朋友解釋艾菲泵奶再餵係間接餵母乳，佢哋當年埋身食就係直接餵，當時真係聽到有D心酸㗎），所以苦等咗兩個幾月後，終於畀艾菲見到BB豆豬埋身食到反晒白眼，再加嘴角含奶嘅樣，嗰種興奮實在非筆墨所能形容﹗

而且BB豆豬肯埋身食，除咗以後唔使再每餐花兩個鐘泵奶餵奶，唔使再驚泵奶時畀燒腩仔同BB豆豬搞到無奶出，慳返唔少時間休息同做自己嘢（好似呢篇blog寫幾日已經搞掂，上一篇寫成個幾星期先寫完），就連出街都方便咗好多，之前出街一定要諗定去邊泵奶，泵奶時邊個照顧住兩個細，拎齊泵同樽先可以出門口，頂盡六、七個鐘就要返屋企，宜家拎住條餵奶巾就可以四圍走（個媽咪袋即時輕便咗），夾啱時間坐車時餵又得，食飯時邊食邊餵亦得（嘻...艾菲係個比較大膽同open嘅母乳媽媽來），以後去幾耐街都無有怕啦﹗