兩個月

話咁快我已經兩個月大啦﹗為咗紀念呢個咁重要嘅日子，媽媽同哥哥特登安排我同伍餐肉哥哥一齊影相，媽媽話哥哥當年都有咁樣同伍餐肉哥哥影相㗎，佢哋想我延續呢個傳統喎...



我宜家一日食五至六餐，全人奶用樽餵每四個鐘食150ml，開始越來越唔肯埋身食，成個月都只係成功埋過兩三次身，仲要係瞓到矇矇鬆鬆嘅情況下當媽媽奶咀咁啜住瞓咋（無一次食到一餐），一清醒即爆喊推開媽媽（艾菲：好傷心，嗚...），媽媽開始擔心我再大D會更加唔肯埋身，甚至有時會心灰意冷到想放棄餵人奶（艾菲：特別係之前奶量忽然急跌個星期），但眼見我對節瓜腿成功谷多一節出來，頭圍身長同體重都跟住自己條成長線有所增長，又覺得應該再堅持多一陣。



我暫時未有戒夜奶嘅意思，仲成日越夜越精神，日頭好好瞓嘈極唔醒，一到凌晨十二點就醒晒，碌大眼笑晒口咁撩人玩，搞到爸爸媽媽大叫頭痛，不過最近都有D小進展，間中會喺飲完凌晨餐奶後拖到五至六個鐘先再食，等佢哋可以瞓多一陣咁囉。



而呢個月嘅最大進步係終於適應自己張床，唔會再一落床即醒或爆喊，亦開始識得自己瞓唔使人抱住瞓，自己啜住個奶咀一陣就自然瞓著，基本上我要瞓你係唔會阻到我，我唔想瞓你抱我幾粒鐘都唔會肯瞓。



媽媽讚我係個開心寶寶，成日飲完奶或者poo poo完會好開心咁喺到甜笑，仲開始識得撩人玩，你同我講嘢我仲識得「un」一聲咁應返你㗎，不過媽媽就話我比哥哥當年黐身，成日喊到七情上面咁扭人抱，搞到連哥哥都識講「嘩﹗你使唔使喊成咁呀？」（艾菲：真係有眼淚仲要喊到眼蓋紅晒好誇張㗎）。



我宜家開始望到多D嘢，會成日望住爸爸媽媽嘅後面發呆，最鐘意望客廳幅幾米砌圖，又識追住床鈴D公仔來望，而條頸仔都開始有力，識得自己兩邊擰唔會瞓到頭扁，tummy time時仲已經可以靠自己撐起個頭仔一陣。



呢個月無再同媽媽玩交換脂肪，媽媽體重無回落跡象，肚腩仔都無收到，仲為咗keep住奶量而變得大食咗添，眼見佢為我嘅犧牲實在無以為報，唯有努力D繼續飲多D奶，送返個肥面珠同雙下巴過佢啜吓啦﹗