前一個星期日，離開錦田鄉村俱樂部後，我哋就去咗元朗食飯，基於被自由人攻陷嘅元朗實在人多得恐怖，所以食完飯我哋就急急腳徹退，向住另一個目的地嶺南大學進發，順便帶燒腩仔去坐吓喺馬路行嘅火車輕鐵。
嶺南大學，係艾菲嘅母校，短短三年嘅校園生活，雖然無上莊亦唔太投入，但足以影響艾菲一生，每次行入學校大門，都會特別感概，到宜家仲清楚記得，想當日Jupas no offer，自覺衰到貼地徬徨無助時，就係嶺南畀咗個重生嘅機會自己，所以畢業之後每遇到咩唔開心諗唔通，艾菲總會返來學校行吓望吓，提醒自己係幾咁幸福同幸運。
今次帶燒腩仔來，其實係想畀佢見識吓嶺南貓嘅魅力，點知...返到來一隻嶺南貓都見唔到，反而昔日嶺南貓嘅莆點變咗呢個彩園，有無人知佢哋去晒邊呀？？？
之後再帶佢返南宿行吓，唔...如果想當年有個咁正嘅男神企喺hall門口，接艾菲返學放學同去玩就爽啦﹗其實艾菲Year 1時係住北宿嘅，到Year 3先住南宿，不過北宿條陰司路已經面目全非，再加上明知小虎已經過咗身，所以就無專登行過去啦﹗
學校四周都佈滿雨傘運動嘅痕跡，呢D就係香港人一直珍而重之嘅學術自由同言論自由，無論你支唔支持呢個運動，你總唔會願意放棄呢D香港嘅核心價值掛？
喺學校無無聊聊咁行咗個圈就走，踏出校門艾菲又要做返自己啦，唔...要繼續加油呀﹗
沒有留言:
張貼留言