又來到一年一度賞紅葉嘅季節，所以襯前一個星期日一早入咗迪欣湖，見出返來都順路就帶燒腩仔去青衣公園走一轉，可能因為時間尚早D葉仲未變晒紅，所以呢日出奇地唔係太多人（上年試過星期日來旺到去咗旺角咁），係多咗D龍友帶齊裝備企喺D影相位到狂影姐，不過亦因為咁益我哋可以影到張唔錯嘅家庭相（請龍友揸機影相是常識吧，kakaka...）。
由第一年來，燒腩仔仲係個手抱BB，到第二年來只係顧住追白鴿，今次第三年來活動能力再強勁D，完全失控好似枝箭咁四圍跑，想叫佢企定定影張相都難，唔係唔望鏡頭就搵手遮住個樣，又或者望住鏡頭整個核突笑，再來就未企定已經走咗去。
專登拉佢去返公園中間個影相位影返張相留念，對比返之前兩年喺同一個位置影嘅相，今年終於唔使舉啞鈴咁舉高佢來影，出來效果都叫做自然D，唔...唔知呢D相仲可以影多幾多年呢？
咁辛苦做完model影相，梗係要奬佢去遊樂場玩吓放吓電啦，呢到嘅遊樂場範圍都算大，而且設施都幾齊，想玩咩都有。
以前行呢D會搖嘅橋勁驚死，要一步一步扶實慢慢行，宜家大個仔唔再驚，仲學其他小朋友喺橋上面跳添呀﹗
連滑梯同底褲韆鞦都玩埋，應該都盡慶而歸啦，不過呢個小朋友玩到癲晒，要佢走時都有D扭，但氹吓氹吓都跟我哋走咗，呼...家陣同佢出街真係個腦轉慢幾秒都唔掂呢﹗
沒有留言:
張貼留言