我今日五個月大啦﹗上兩個星期去咗健康院打針順便磅重，原來我宜家有7.12kg重，成長線由兩個月前嘅10一下子跳到50，奶粉嘅威力真係好得人驚，宜家媽媽成日話我係肥仔，仲會笑我有兩隻強壯嘅大脾，真係畀佢激死呀﹗
媽媽返來屋企一個月，我嘅生活都變得好有規律，一日五餐奶每餐五點五安（簡中會食剩50ml左右），每朝八點半起身飲第一餐奶，跟住就會即刻再瞓瞓到中午十二點沖涼，沖完涼飲完奶休息一陣，兩點左右我就會瞓晏覺，一瞓就差唔多四點先起身，起身玩陣飲奶之後五點半我會瞓第二次晏覺，七點半左右起身爸爸就啱啱好放工返來同我玩，玩陣飲完奶我會瞓多半個鐘至一個鐘，跟住十一點幾十二點就會飲最後一餐奶，然後就會乖乖上床瞓覺。
媽媽讚我宜家乖咗好多，少咗無原無故喪扭計，多數扭都係扭眼瞓姐，咁佢同我著睡袋放我落床我就會自己瞓，頂多係起身時會出盡力爆開睡袋走出來，再踢走晒所有被同周圍掟隻陪瞓bear bear，將張床整亂晒要媽媽同我執手尾，嘻...只要每次媽媽行埋來時我望住佢笑，咁佢就唔會鬧我o架啦﹗
呢個月我都好努力咁學緊轉身，不過就轉來轉去都未完全轉到，只係試過媽媽襯我扭腰玩時踢我pat pat，跟住我就轉咗身成個扒咗係playmat，仲好叻仔咁自己將隻手鬆返出來添，但就因為換片時我都好勤力咁練習不停撐來撐去，搞到媽媽忍唔住話我百厭無我乎，剩機拎咗幾條Fitti學習褲試用裝來招呼我。
至於食嘢方面，雖然我宜家仲未食得固體食物，但媽媽每次食飯都會放我坐highchair望住，我初初覺得好悶會發皮四想走佬，但最近開始對媽媽同爸爸食嘅嘢有D興趣，佢哋D食物日日都唔同樣好似好得意咁，媽媽試過畀DD麵包皮我食，但我就淨係識傻笑同吐返出來囉，嘻嘻...
仲有呀仲有呀，媽媽呢個星期又有新搞作，就係加個柄落個奶樽到同買咗隻學習杯畀我，我只係學咗兩日就識得自己拎住奶樽飲奶同飲水啦（當然都仲要媽媽係隔離幫手）﹗如果飲唔到D奶奶我仲識得舉高D隻手等D奶奶向下畀我啜，媽媽見到之後勁讚我叻仔，話遲D我飲得越來越好就轉step 2鴨嘴畀我飲呀﹗YEAH!!!
燒腩仔真係又乖又叻呀！
回覆刪除[Ivy03/07/2013 18:25:09]多謝EE
好叻呀，咁快肯自己拎！
回覆刪除happy 5 months!
[Ivy03/07/2013 18:27:44]多謝EE，佢其實差唔多四個月時已經開始手多多，飲親奶都會伸手去模個樽或者搞拎住樽隻手，有時大力到會推跌個樽，我見佢對手咁得閒咪索性畀佢自己拎囉﹗
叻叻呀識自己拎奶樽! 我都好想龍BB快d學識呀!
回覆刪除[Ivy03/07/2013 18:45:13]捉住佢隻手慢慢教，示範畀佢睇同多D讚佢就得架啦，我隻燒腩仔見我好浮誇咁拍晒手讚佢叻仔，就會好開心咁笑住將個水杯放入口飲，但之前用奶樽餵佢飲水佢係唔肯飲吐返晒出來﹗
咁快識自己拎水樽，我都係時候要train下佢啦
回覆刪除[Ivy03/08/2013 19:06:24]要呀，健康院份資料好似話7個月已經可以學用杯（鴨咀）飲水，歲半就要同佢戒奶樽廢事容易蛀牙，我就見燒腩仔成日飲奶手多多搞個奶樽或者拎開我拎住奶樽D手指，所以畀個柄佢自己拎住無咁得閒搞搞震
happy 5 month old! 俾媽媽湊番既燒腩仔係唔同啲喎!
回覆刪除[Ivy03/08/2013 19:02:46]始終都係阿媽狠心D，唔會扭兩扭就乜都就晒佢，所以生活即刻好有規律，而且有時間可以教佢多D新嘢
好可愛！早d比小朋友吃固體食物可訓練口部肌肉呢！
回覆刪除[Ivy03/08/2013 19:00:40]THX﹗
自己湊果然吾同呀, Ivy媽媽加油呀!
回覆刪除[Ivy03/13/2013 16:57:51]燒腩仔都係瞓係我張床隔離架，反正佢唔瞓就大家一齊唔使瞓，所以我會放咗佢落床然後出返廳等佢瞓，期間當然要間唔中裝吓佢，等佢瞓著咗我先返入房瞓，宜家佢慣咗點扭我都係唔會抱佢，我就可以放佢落床然後坐係隔離上網，只係盡量避免同佢有眼神接觸就可以
[Annie回覆03/13/2013 16:11:38]我始終唔夠狼心!及現在換了子母床，唔可以走開唔睇住一仔瞓著先。
[Ivy03/11/2013 21:13:56]其實都係靠狠心，BB到咁上下大就會開始有個穩定的生理時鐘，你見佢差唔多夠鐘同眼瞓就放佢落床，每次都做類似動作例如著睡袋開音樂放落床然後行開唔好俾佢見到你。
佢初時一定會喊到拆天，但你要狠心唔好理佢由佢喊，如果佢越喊越激動唔肯收聲，你先試吓係側邊拍吓佢等佢冷靜，但千祈要忍住唔好抱佢，佢喊到咁上下自己攰就會瞓，然後試咗一次之後第二次佢就唔會喊得咁勁，跟住就會一次比一次好直至成功自己瞓
[米奇回覆03/11/2013 12:00:23]可以分享下你點訓練燒腩仔自己訓嗎? THX~THX~
[Ivy03/11/2013 01:31:58]THX﹗自己湊一定會多D時間同心機慢慢教﹗
燒腩仔好叻叻呀, ivy mama 自己揍bb 真係好用心呀, tarebaby 而家8個月, 我琴日先買左set 學習杯比佢咋... 好慢呀...
回覆刪除[Ivy03/12/2013 13:59:04]既然佢對手咁得閒，就買個柄畀佢拎住來飲啦，D小朋友一有新嘢玩就會好開心然後好快學識
[Tareworker回覆03/11/2013 21:54:25]tarebaby 飲奶時都係手多多嫁, 會拍下拍下個奶樽, 唔知係咪想自己拎定點, 我諗住買埋個手柄比佢試下.
[Ivy03/11/2013 21:05:14]其實健康院本書都係話七個月先開始學用杯，八個月都未遲呀，只不過燒腩仔成日飲奶都手多多搞搞震，我廢事佢隻手咁得閒先咁快俾佢學之嘛
SEE~ 自己湊係唔同D呀... 又一次羨慕死隔離 = (我)
回覆刪除[manchi回覆03/15/2013 08:47:12]忌廉火柴 : 我都同你一樣..勁羨慕可以自己湊
[Ivy03/13/2013 00:14:07]嘻...因為我自己夠狠心唔會咁容易畀佢扭兩扭就就範姐