六月尾最後一日返學舉行結業禮，艾菲遵守承諾帶埋BB豆豬去接燒腩仔放學（之前坐月好耐無去學校接過放學），一心以為燒腩仔會好開心，點知有人全程鬧情緒，到夜晚仲發惡夢大吵大鬧，最終要叫醒佢問佢咩事，結果有人喊住咁同艾菲講「我好唔捨得X老師呀﹗」，OK...咁咪帶埋你一齊去見家長囉。
家長日前一日已經不停提佢要乖，因為要夾啱BB豆豬飲奶時間先可以出發，無奈呢個小朋友都係唔太合作，再加埋BB豆豬無心機飲奶用多咗時間，搞到我哋要匆匆忙忙咁飛的去學校，好彩前一個家長仲未出來，我哋去到就啱啱好入得課室。
老師先拎燒腩仔本成長冊出來，簡單講解吓燒腩仔嘅學習情況，大致上都無咩問題跟到進度，係英文同普通話堂，到下學期仲係唔專心上堂，完全唔驚兩個net teacher，成日聽唔明就同同學仔喺到大笑搞事，所以成績只係普普通通。
至於情緒控制同自理能力方面，老師就大讚燒腩仔進步咗好多，喺老師提醒下少咗鬧情緒，遇有不快時亦肯冷靜落來慢慢解決問題，見佢喺學校表現唔差，艾菲就請教老師應該點樣處理佢嘅壞情緒，皆因佢離開學校之後即變第二個人，有咩唔滿意即大吵大鬧甚至郁手郁腳，搞到艾菲同米高好頭痛...
老師都建議咗D方法畀艾菲，盡量要喺佢發嬲前提醒佢冷靜（呢個好有難度，因為佢D壞情緒係一秒就來），亦唔好畀佢經常處於激動嘅情緒之中，最後老師畀咗個最重要嘅心得艾菲，就係唔好畀佢激嬲，只要大人嬲畀佢牽動到情緒佢就成功咗，老師都話佢係知自己發脾氣唔啱，不過始終係個只得三歳嘅典型男仔，既衝動又心急，自制能力有限，要畀D時間佢慢慢學習忍耐同等候。
另外艾菲都向老師提及燒腩仔專注力差嘅問題，老師嘅回應係佢係比較易分心，但未至於影響到學習要評估嗰種咁嚴重，建議艾菲可以多D畀佢砌砌圖，砌lego之類來訓練專注力，亦可以要佢坐定逐頁睇書再覆述內容出來，對增強專注力會有一定幫助。
一輪咀咁同老師傾咗好耐，唔覺唔覺就傾咗半個鐘，好彩我哋後面無家長等，但就阻咗老師lunch放飯嘅時間，至於聲稱好唔捨得老師嘅燒腩仔喺到做咩呢，就係全程喺隔離搞搞震，不斷拎D嘢出來叫艾菲幫佢整，意圖打斷艾菲同老師之間嘅對話（每次艾菲同老師傾偈佢都會咁），到走時又話唔想收玩具來拖延時間咁囉...
仔...來緊升K2四歲啦，你幾時先大個仔，少D扭擰多D合作呢？長期咁搞法真係好擺命㗎...
沒有留言:
張貼留言