米高說好了嘅復活節trip，因為突發事臨時取消咗，咁四日復活節公眾假期總要搵D嘢畀燒腩仔玩，好彩最後關頭我哋又有得去馬會嘅同心同步同樂日，今年同上年嘅玩法有少少唔同，攤位遊戲唔再係免費任玩，不過每個人一入場就會收到$60遊戲卷（唔夠可以之後再買），同樂日指南，同埋一條頸繩來玩遊戲儲襟章。
早一晚同燒腩仔講定會去馬場玩，佢晨早未九點就自己彈起身話出發，以為佢今年大個仔應該會好興奮，點知...一入場見到face painting，golf putting，3D畫影相區，佢通通都話唔玩...
就連呢個以為佢會好like嘅BB版彈床障礙賽，佢都堅決say no話唔玩...
咁我哋唯有帶佢睇埋看台附近，有高度限制畀大小小嘅小朋友玩嘅彈床遊戲（相呢兩個真係堅好玩，睇到艾菲都想自己排隊玩埋一份囉），就同佢轉戰彭福公園嘅同策駿馬園。
過到彭福公園，可能地方空曠D，有地方畀佢跑跑跳跳，心情先終於好返DD會笑...
請埋佢食爆谷，心情又再好多DD咁啦...
然後就主動話要玩呢架公園入面嘅搖搖車啦﹗
再順利氹到佢排隊玩彈彈馬兒賽，已經係第二年玩，以為佢表現會好D，點知又係hea爆出閘等人拖，好彩今年大會有安排工作人員照顧小朋友，咁啱早一日有少少扭親條腰嘅米高先唔使出動，可以喺場邊抖抖做啦啦隊。:p
玩完本來想同燒腩仔去睇韻律馬術表演，但佢又堅持唔肯埋去睇，搞到超級馬迷米高勁無癮，o...
咁一場來到，唔睇表演都循例同雪特蘭小馬影返張合照，條隊同上年一樣係超...長，艾菲同米高唯有輪流陪燒腩仔放吓電，喺附近草地跑跑跳跳消磨吓D時間。
等咗差不多45分鐘，終於到我哋影，明明有人上年擺晒pose摸實隻馬笑得勁開心，排隊時見到D馬仔又讚佢哋靚，但埋到去就喊驚唔肯摸馬仔，更加唔肯自己同馬仔獨照。
影完相見時間差不多，我哋就齊齊陪米高去睇越野賽馬術示範，可能我哋企開邊無咁多人圍觀，今次燒腩仔又無say no話唔睇喎，艾菲問佢D馬行路係咩聲仲識扮返「咯咯咯咯」畀我哋聽。
睇埋馬術表演我哋就返過馬場，可能係呢幾日不停落雨，彭福公園D草地都偏濕，輪輪盡盡嘅燒腩仔更加係唔小心跌親整到成身泥，結果我哋要同佢去育嬰室換褲抹鞋，雖然呢個臨時育嬰室嘅位置係比較偏僻，不過佢有兩間房更加有職員睇住，就好似我哋用時有媽媽喺其中一間房餵奶，職員就安排我哋用另一間房換片換褲唔會騷擾到佢。
而另一樣貼心嘅安排，就係佢哋竟然喺洗手間到放咗張凳仔畀小朋友洗手，大家有帶過小朋友去大人洗手間嘅媽媽，應該都試過抱得佢哋洗手來又開唔到水喉，或整到小朋友成身濕晒嘅經驗，特別係艾菲呢D大肚媽媽就更加唔方便抱小朋友洗手啦，所以見到呢張凳仔真係忍唔住影低來讚吓馬會﹗
清潔好，我哋就去咗同做DIY個位到報名玩遊戲，報完名見時間唔係得返好多，所以求其買D小食來填飽個肚就算。
食飽就即刻埋位DIY，我哋同燒腩仔報咗整太陽帽，大會會提供晒所有物料，姐姐簡單介紹點整之後大家就可以自己整。
經過一輪黐黐貼貼後終於完成呢頂馬仔太陽帽，起初叫佢帶來影相都扭扭擰擰，但走嘅時候喺街有太陽曬叫佢帶佢又肯帶一陣喎，小朋友嘅心情真係仲難觸摸過女人心呀，kakaka...
小貼士：場內有好多個DIY攤位，家長可以按年齡幫小朋友報名，最細好似燒腩仔咁3歲已經可以玩，建議一入場就去報名，我哋中午時份先報，有好多已經full到黃昏時間先有得玩
整完太陽帽，我哋就帶咗燒腩仔過隔離區嘅同建綠家園，顧名思義就係一D關於環保意識嘅攤位，小朋友有得玩又學到環保嘅知識都幾有意義，可惜是日勁hea嘅燒腩仔，連拋乒乓波都懶到只係放入眼前個筒，我哋猛叫佢拋遠D都唔理，激死﹗>.<
同建綠家園隔離仲有個同遊小天地，都係一D啱燒腩仔呢個年紀玩嘅遊戲攤位（充氣迷宮之類嘅玩意，有D都有高度限制），不過眼見佢玩咗大半日明顯有疲態，兼幾堅持話唔再玩，同遊戲攤位D人龍越來越長（一過咗中午時份就開始多人），我哋就決定同佢返屋企休息，但有樣嘢又係不得不讚馬會嘅安排，就係喺長長嘅人龍隔離，set咗個免費playroom咁嘅area，可以等小朋友玩住等，減低佢哋等到唔耐煩扭計唔合作嘅機會（呢個安排有幾緊要，帶過小朋友參加呢類嘉年華活動嘅父母就最明）。
其實除咗呢D畀小朋友玩嘅攤位遊戲同馬術表演示範之外，場內仲有展覽展出香港過去喺國際運動大賽贏得嘅珍貴奬牌奬盃，又有一D關於運動嘅3D藝術畫任你影，另外仲有曼聯朴智星分享會教小朋友踢波，真係大人細路都好啱玩，就算艾菲第二年參加呢個活動都完全唔覺得悶，當然如果燒腩仔可以再投入多D同少D扭擰的話就更好，宜家唯有希望下年馬會再搞時我哋仲有機會同時間入場玩啦﹗
沒有留言:
張貼留言